Compilatiecorpus Historisch Nederlands 1.0 (CHN): ambtelijke teksten 1250-1800: breda_1308_1

<begin>
Allen den ghenen die desen brief seelen sien oft horen lesen wy scoutait scepene raet ende die ghemeyne porte van Breda saluut ende kinnisse der warheit Wy doen u teweten ende orconden med desen brieve
</begin>
<main>
dat wy overmids ghemeyne orbore dat dar ane ghelach hebben ghesceden tconvent van den nonnen van Breda van den gasthuse van Breda in derre maniren dat dese vorseide nonnen soelen hebben enen weech gaende neffens den veistgraft twentech voet wyt van den veistgrafte of darbi Vort ane so moghen dese vorseide nonnen houden erflike ende ewelike sonder enech weder seggen op die gemeynt van Breda acht coye acht verken ende vire perde Vort ane die vive ende dertech scellinge swarte tornoyse die dese vorseide nonnen hadden gheloeft desen vorseiden gasthuse van dien bossce ende van den beemde die bi hem ghelegen syn die hebben sie wittelike ende redelike af ghecoft omme ene somme van penningen die desen vorseiden gasthuse ghehelike vergouden es Ende hiir mede sal wesen goed pays ende goede vrinscap tusscen die nonnen ende gasthuus voer ghenoemt ende gasthuus ghesceden van den nonnen ende die nonnen weder van den gasthuse
</main>
<end>
In kennissen der warheit es dese brief bezegelt med onser ghemeenre porte zegele van Breda Gegeven int jar ons Heren M CCC ende achte des manendages na beloken paesscen
</end>