Compilatiecorpus Historisch Nederlands 1.0 (CHN): ambtelijke teksten 1250-1800: breda_1308_3

<begin>
Wij henric sterko ende willem Sluse scepenne in breda Orconden med desen letteren
</begin>
<main>
dat voer ons quam diederic die bonte ende machtelt sijn zuster ende machtelt sire zuster iden dochter med haren montboren ende iffenden onderlinge van dien versterfte dat hem verstoruen was van harre moeder ende harre oudermoeder dode ende med deser [] verteech elker manlic op andren metten vonnisse ende med den rechte vort ane alsoelke delinge van dier erfnissen als machtelden harre niften harre zuster iden rechtes behoerde war dat si gheleghen was binnen breda oft buten breda die gaf si med haren montbore haren oem diederike voergenoemt tenen rechten erfcijnse omme virtech scellinghe enen ouden conincs tornoysen gherekent o[v]er zeestijn penninge oft payment dat goed iegen is te ghelden altoes deser vorseider machtelden of den ghenen die houder es van desen brieue op sente mertens dach in den wijnter war oke dat sake dat dese vorseide machtelt storue dat diederic vorgenoemt noch machteld [] moye negheen recht ane desen vorseiden cijnse mochten hebben oft behouden Ende dar hebben si op verteghen also als vonnisse wisede ende recht was vortane eist vorwarde war dat sake dat diederic voergenoemt cofte virtech scellinge jarlic cijns payments voerghenoemt binnen [h]heiden oft buten [h]heiden op een pant dat die scepenne oft die manne seiden ende priseden dat goed genoch ware tote machtelden behoef of des gheens die houder es van desen brieue so sal diederix bonten pant quite ende vri sijn van desen vorseiden cijnse
</main>
<end>
Jn kinnissen der warheit es dese brief bezegelt med onsen zegelen jnt jaer ons heren M ccc ende achte [d]es vriendages na sente seruaes dach
</end>