Compilatiecorpus Historisch Nederlands 1.0 (CHN): ambtelijke teksten 1250-1800: breda_1341_1

<begin>
Wij willem van mechgele ende aernoud vanden neste Scepenne in breda Maken cont ende kenlijc allen luden
</begin>
<main>
dat voer ons quam jan van maere ende lide dat hi hadde vercocht wittelike om een somme van penninghen die hem ghehelijc betaelt es Clause van oekel zesse grote siaers comans ghelt op Sijn hws ende op sijn erue datter toe behoert dat gheleghen es aldernaest aernts zomaerts erue op die een zide ende jacobs eghels erue op dander alle iaer te ghelden clause voerghenoemt of sinen nacomelinghen op sunte bauens dach behoudelijc altoes den tveeen ende dertoch groten siaers die daer te voren wtghaen ende voert so heeft jan vorseit desen vorseiden pand gheloeft goed ghenoech te waren jn welken cijns vorseit die voernoemde clause es inghedaen ende gheuest met vonnisse ende met rechte na die coren ende ghewoente vander poert van breda daertoe ghedaen was al datmer sculdech toe was te done
</main>
<end>
jn kinnissen der waerheit es dees brief beseghelt met onsen seghelen Ghegheuen jnt iaer ons heren M ccc ende een ende veertech
</end>