Compilatiecorpus Historisch Nederlands 1.0 (CHN): ambtelijke teksten 1250-1800: breda_1343_1

<begin>
Wij claus van oekel ende aernout die grawe scepenne in breda Orconden ende kinnen met desen brieue
</begin>
<main>
dat voer ons quam gheraert diemen heit eghel ende lide dat hi vercocht hadde wittelike om een somme van penninghen die home ghehelijc betaelt es joncfrouwen beatrisen van hertele meesterse vanden beghijnhoue van breda toet sunte katelinen behoef aen die firmarie vanden houe iaerlijcs te legghen dertien grote siaers erfcijns alsulker grote alse die een coman den anderen mede betalen mach toe allen cijnsdaghen op dat hws ende dat erue daer gheraert in plach te wonen dat gheleghen es in die brugghestrate aldernaest aernts baers erue op die een side ende rutten heren rutgheers sone was vter haghe op die ander zide welc dertien grote voerseit diederic vrient iaerlijcs wtreiken sal behoudelijc altoes neghentien grote die he[rm]an die ledeghe daer af iaerlijcs wt heft ende op dat voernoemde erue staen alle iaer te ghelden joncfrouwen beatrisen of die meesterse van shoues weghen es op Sunte bauens dach ewelijc ende vmmermeer jn welken voerseiden cijns joncfrouwe beatrijs voerseit es in ghedaen ende gheuest toet sunte katelinen behoef bi maennisse des richters ende wijsdomme der scepenne dier sculdech ouer waren te wisen daertoe ghedaen was al dat mer sculdech toe was te doene met enen rechte na costume ende ghewoente vander poert van breda die te haer comen es
</main>
<end>
Jn kinnissen der waerheit es dese brief beseghelt met onsen Seghelen ghegheuen jnt iaer ons heren M ccc ende drieendeveertech op Sunte Agneten dach
</end>