Compilatiecorpus Historisch Nederlands 1.0 (CHN): ambtelijke teksten 1250-1800: breda_1344_1

<begin>
Wi willem leinsen sone ende aernoud die grawe scepenne jn breda Orconden ende kennen med desen brieue
</begin>
<main>
dat voer ons quamen onser vrouwen broeders van markendale dats teweten jan van den houte jan haec laurens vander brugghen heine brugghe arnoud bellaerts sone ende ander brueder van markendale dies machtech waren op dene side ende die ghene die goed hebben ligghen after markendale dat es te weten willem van der brugghen aernoud beuer yde wouter lotijns jan heelt willem bolle willem reyners sone peter van den water die smit wouter crabbout jan coman mathijs van den water ghibel van der brugghen boudewijn van helsdonc ende diederic fyen sone op dander side ende droeghen ouer ene ere wisselinghen in derre manieren dat onse vrouwe van markendale sal hebben ende behouden dien wech die after markendale ghinc tote dien goede dat daer after gheleghen es ende daer haren orboer mede doen ende willem van der brugghen ende sinen ghesellen voernoemt die daer after gheleghen sijn die sullen voertmeer weghen doer dat veken ouer onser vrouwen goed van markendale tote haren goede toe ten corsten velde ende ter minster scaden ende varen ende keren si ende hare nacomelinghen onverseghet alsi willen ende Ende begaren
</main>
<end>
omme dat dese wisselinghe vaste ende ghestade sal bliuen tote eweliken daghen ende omme beden wille van den partien voerseit so hebben wi desen brief bezeghelt med onsen zeghellen jnt jaer ons heren M CCC viertech ende viere jn sente peters ende sente pauwels daghe binnen wedemaent
</end>