Compilatiecorpus Historisch Nederlands 1.0 (CHN): ambtelijke teksten 1250-1800: breda_1359_1

<begin>
Wy Gheraerd die Bonte Jan Mathys sone ende Jan van Woude scepenne in Breda ende late tsheren van Breda orconden ende kennen med desen brieve
</begin>
<main>
dat voer ons quam Pauwels Bystroe ende verlyde dat hi sculdech ware Diederike die men heit Tielken Manen twe scellinghe ouder grote tsjaers erfcyns op syn huus med sinen toebehoerten daer hi nu in woent gheleghen opten Hoernike bi Heinrycs Maghermans huus was ende daer na soe verlyde dese zelve Pauwels dat hi hadde ghenomen van Diederike voerseit ene vyftendeel van enen beemde gheleghen achter die belkenaemsche berghe over twelf grote tsjaers erfcyns moenten daer dene coman den andren mede betalen mach voer welke twelf grote Pauwels voerseit hem gheset heeft Jueten yftendeel syns wyfs van den zelven beemde alse thenen rechten onderpande ende voert syn recht van den lande dat men heit dat Nieuwelant gheleghen by die slachmoelen over drie lopen roghs erfpachts goet ende custbaer daer Pauwels vd voerseit hem oec geset heeft Jueten kynsdeel syns wyfs als van den zelven nieuwenlande oec thenen rechten onderpande altoes te gheldene desen pacht op onser vrouwen dach lichtmisse alsmen kersen draghet ende dese twe schellinghe ouder grote ende dese twelf grote payments voerscreven op sente Mertyns dach in den wintere altoes daer naest volghende
</main>
<end>
In orconden desen brieve bezeghelt med onsen zeghellen int jaer ons Heren M CCC vyftech ende neghen achtiene daghe binnen lochmaent
</end>