Compilatiecorpus Historisch Nederlands 1.0 (CHN): ambtelijke teksten 1250-1800: breda_1364_1

<begin>
Wy Arnoud vanden Neste en Jacob die Rover scepen in Breda ende manne tsheren van Breda orkonden met desen brieve
</begin>
<main>
dat voir ons quam Arnoud Aernt Blox sone was voir hem selven ende als mombare Kathelinen synre suster ende lyde dat hi ghedeylt ende ghecavelt hadde jeghens Peteren van Gagheldonc ende sinen kindren die hy bi Kathelinen synen iersten wive hadde twe hoeven met horen toe behoerten dair die ene hove af leghet op die molenvloet ende die ander te Chame gheheten die Honsdonc in deser manieren dats te verstane dat Arnoud ende Kateline voirnoemt hebben ende behouden sullen die hoeve gheleghen op die molenvloet met sulken commer als hier na bescreven staet dire jaerlyx uut gaet inden eirsten Diedric Sterke dertich grote tsjaers payments item op die Lovensdonc twintich oude grote item op die Croecht Sterke met sinen ghesellen zestien oude grote item noch op die Croecht Wouter Beerten elve oude grote item op ten Aert dertich oude grote vier miten min item op die Vucht die here van Boutersom acht scellinghen vier penningen ouder grote item een half boenre in Spoerdonc metten heren chynse item dat Claeus van Oekel dair op hadde seven viertel rogs item Aecht Tsgruters een derdendeel van enen zester rogs item die heylighe gheest een halster rogs item dat Pieter van Dorst dar op hadde vyf lopen rogs item Pieter Verlisen een viertel rogs item so es voirwaerde dat Arnoud ende Kateline voirseit uut dese voirseide hoeven met hoere toebehoirten gheheten die Molenvloet uut reyken ende gheven sullen alle jare Peteren van Ghageldonc ende sinen kinderen voerseit drie zester rogghen tsjaers erfpachts te ghelden op onser vrouwen dach ter lichtmis als men kersen draecht der hoeven gheleghen te Chame te baten Ende wair dat zake dat op dese voirghenoemde hoeve meer of min commers vonden ende ghewonnen warde metten recht dan voirseit es dat souden Aernt Kateline Peter en syn kinder voirseit ghemeyn ghelden ende op heffen een yghelic alsoe verre als hi daer in gheboren ware Welke deylighe ende cavel Arnoud voirseit voir hem selven ende als mombare Katelinen synre zuster heeft gheloeft te houden ende synre suster te doen houden ewelike ende immermeer op hem ende op syn goet in allen manieren als voirscreven es
</main>
<end>
In kennes der waerheyt bezeghelt met onse zeglen int jaer ons Heren dusend drie hondert tsestich ende vier vyf daghe in octobri
</end>