Compilatiecorpus Historisch Nederlands 1.0 (CHN): ambtelijke teksten 1250-1800: breda_1366_1

<begin>
Wi Bertelmees Godscalcx soen ende Jan Mathiis soen scepene in Breda orconden
</begin>
<main>
dat voer ons quam Lysbet Aernds Harts dochter met horen mombare die hoer met rechte daer toe ghegheven waert ende lide dat si wittelic vercocht hadde om een somme van ghelde die hoer ghehelic ende al betaelt is Willem Willemets sone was dertich grote tsjaers erflix chiins payments daer die een coman den anderen mede betalen mach te gheldene alle jare te sente Martyns daghe in den wintere ute dien huyse ende erve met synre toebehoerte daer Gheertruyt Belliins in woint gheleghen in die gasthuys strate tussen Jans huyse van Mechlen des Vleyshouwers aen die een side ende den huse dat Jans van Woude Heynric Smoutkens sone plach te siin aen dander side in welken erfchiinse Lysbet vorseit ghevest heeft Willem voerghenoemt alse vander eenre helft die haer daer af aen beloept met vonnes ende met rechte so dat Willem dies seker is en vaste Voert so heeft Lysbet voerseit gheloeft met horen mombare die haer oec ghegheven was met rechte dat si Jan Aernts soen horen broeder binnen jaers na dat hij bejaert es sal doen vesten Willem voerghenoemt of syn erfghename in dander helfte van den vorseiden chiinse ende daer in erven met den rechte Ende daer af syn borghe Heynric van Eyselle ende Heynric van den Dike die jonghe ende hebben gheloeft dat te voldoen op hem ende op hoer goet waert dat Lysbet vorseit daer af in enighen gebreke waer welke principale heeft gheloeft met horen mombare die vorseide borghen scadelos te quiten
</main>
<end>
In kennes der waerheit met onsen zeghlen beseghelt int jaer ons Heren M CCC tsestich ende sesse des zondaechs na sinxen dach
</end>