Compilatiecorpus Historisch Nederlands 1.0 (CHN): ambtelijke teksten 1250-1800: breda_1368_1

<begin>
Wj aernd vanden neste ende jan mathiis sone Scepen jn breda Orconden
</begin>
<main>
dat voir ons quamen jan tucker ende jan gryelen ende lyeden dat si wittelike vercocht hadden om een somme van ghelde die hem vol ende al betaelt es aernd jans sone toter fermeryen behoef vanden beghinen tot breda dertiendaluen groten tsiaers erflix chijns payments dair deen coman den anderen mede betalen mach Te ghelden erflic ende alle jare op sente bauen dach wt enen huyse ende erue met sinen toe behoerten gheleghen aen den haghedijc tuschen peter byens erue aen die een zide ende jonghe jan comans kinds erue aen die ander zide welken onderpand si gheloeft hebben te waren met neghen ende twintich groten jairlix chijns payments voirscreuen dair dese voirscreuen dertiendaluen groten euenghelike mede jairlix voir wtghaen Ende jn desen voirseiden erfchijns es aernd jans sone gheuest ende toe ghedaen met vonnesse ende met rechte toter fermeryen behoef voirscreuen so dat der fermeryen zeker ende vast es
</main>
<end>
jn orcond desen brieue met onsen zeglen bezeghelt jnt iair ons heren M ccc tsestich ende achte twintich daghe jn meye
</end>