Compilatiecorpus Historisch Nederlands 1.0 (CHN): ambtelijke teksten 1250-1800: breda_1368_2

<begin>
Wy Jonaes van der Elste ende Bertelmeeus Godscalx sone scepen in Breda orconden
</begin>
<main>
dat voer ons quam Dieric Sterke ende liede dat hi bewyst hadde ende ghegheven in gherechten aelmossen ende in memorien van sinen jair sanghe te houdene der priorinnen ende ghemeynen convente van den nonnen bi Breda zes scellinghe ende achte penninghen grote tsjaers erflix chyns payments als in buersen gaet te ghelden erflic ende alle jaer den convente voirseit op sinte Baven dach uut alsulken onder pande als die brief inhoud ende begrijpt daer dese brief met onse zeghelen bezeghelt doer ghesteken is In welken erfchynse voirseyd Aernd vanden Neste ghevest is ende toeghedaen met vonnesse ende met rechte tot des convents behoef voerseit so dat den godshuse zeker is ende vaste
</main>
<end>
In orconden desen brieve met onse zeghelen bezeghelt int jaer ons heren M CCC tsestich ende achte twintig daghe in maerte
</end>