Compilatiecorpus Historisch Nederlands 1.0 (CHN): ambtelijke teksten 1250-1800: breda_1377_1

<begin>
Wi Pieter Tierloet ende Jan die Rucheneer scepen in Breda ende late tsheren van Breda orconden
</begin>
<main>
dat voer ons comen syn heer Arnd Bystro canonync te Breda als momber ende Heynric Bartelmeeus Goedscalx zone als toezienre Gheryts Lysbetten ende Aeghten Diric Bystroes kyndere die noch onbejaert syn ende lyden dat si hadden bewyst vander kynder weghen voerseit joffrou Jueten haerre zuster der nonnen te Breda viere scellinge grote tsjaers erflix chyns payments daer deen coman den anderen mede betalen mach alle jare te ghelden op kerssavonde op een alf buynre beemden dat den kynderen voerseit bestarf van haren vader voerseit gheleghen op Belckenem after die berghe op die Marcke behoudelyc drie scelling groten tsjaers payen voerseit die hier voere uut den gheheelen beemde jaerlicx gaen op hoeren gherechten chynsdach Ende hier mede liet hoer joffrou Juete voerseit met haren momber ghevueghen ende verteech metten rechte op alle andere goeden daer si in bestorven mocht syn van doede hoers vaders bi consente ende goedduncken mir vrouwen der priorinnen ende vanden ghemeynen convente voerseit behoudelyc zulcker tochten als si hier en boven heeft met brieven op dat huys ende erve daer haer vader uut verstarf duerende haer leve daghe lang ende niet langher
</main>
<end>
In orconde desen brieve met onsen zeghelen bezeghelt int jaer ons Heeren M CCC zeven ende tseventich vyf daghe in Meerte
</end>