Compilatiecorpus Historisch Nederlands 1.0 (CHN): ambtelijke teksten 1250-1800: breda_1381_1

<begin>
Wij Jan die sloetmaker Cureyt der kerken van Breda Wouter van ykel Coster jn der zeluer kerken op die een side Ende Arnd Jans soen ende Godevaert van Loenhout borghemeystere te breda ghecommitteert jn dese zake vander ghemeynre Stat weghen van Breda op dander side Doon cond allen luden
</begin>
<main>
Dat wij met goeder eendrachte ende minliche[y]t ouermids wittighe bezoeken ende haercomen dat wi ondervonden hebben om te beuellen enigherhande twidracht ende ghescille die in toecomenden tiden risen mochten tusschen ons Cureyt ende Coster vorseit op die een side ende der ghemeynre prochie van breda an dander side gheaccordeert ende verdraghen siin tote eenre ghestentigher declaracie op alzulke poynten als hier na gheroert ende verclaert standen
Jnden eersten van enen kinde te kerstenen zal hebben die prochiaen Enen ouden enghelsken of siin waerde Mer daer af sal hi den coster wtreyken een vierendele Jtem zal die prochiaen hebben van ygheliken menske die tote sinen jaeren comen is ende ten Sacramente gaet enen ouden swarten of siin waerde tote elken vanden vier hoghetiden voer siin offerande Dat es te wetene kersmisse paesschen sinxen ende alre heylighen misse Jtem zal die prochiaen visenteren met den sacramente ende met den olysel alle die ghene die ziec siin ende dies begaren binnen der vryheit van breda sonder enich ghelt daer af te eysken Mer doet hem yemand enighe hoescheit dat mach hi nemen van gracien Ende soe waer hi buten der vriheit yemand visiteert met den sacramente Daer af sal die prochiaen voer sinen arbeit hebben twe oude enghelske ende die Coster enen ouden enghelsken Jtem van eenre bruyt te ondertrouwen en van den kundsel te doen in der kerken en sal die prochiaen gheen ghelt eysken van rechte Jndien dat die bruyt ende brudegom of vriendt van horen weghen [] kundeldaghe ende name an den prochiaen vermanen Mer waert dat die bruyt of brudegom van onleden des niet ghedoen en konden Ende si an den prochiaen verzochten das hi des ghedenken wilde ende hoere name teykende om der kundsele te ghedenken Daer voer souden si den prochiaen gheuen Enen haluen ouden grote oft die waerde Ende als men die bruyt trouwen zal Soe is si sculdich ter kerken te comen met drie kersen wassen van zulker groette als haer ghenuecht en an die een karse zal steken e[n] zilueren penning dien sal die prochiaen hebben met der karsen Des ghelijc es die bruyt sculdich enen zilueren penning den prochiaen als hi hoer sente Jans Ewangelie opt hoeft leset Ende ter rechter offertorie jnder missen es si sculdich te offeren soe wes hoer ghenuecht Voert zal die coster hebben vander bruyt vore sinen paes Enen ouden hollans of siin waerde Voert al[s] yemand des prochiaens brieue begaert om te betonen enen andren Cureyt buten sire prochien jnden seluen bysdom als dat hi ombeslet is van andren hilike Daer af sal die prochiaen hebben na den statuten drie oude grote Ende daer om sal hi hem kundsel doen ende brieue gheuen Ende als hi die bruyt trouwet sal die prochiaen hebben een paer handscoen ende siin maeltijt of twe oude enghelske daer voer Ende die Coster van dien poynte des ghelijc Jtem als een vrouwe ter kerken gaet van kinde soe zalse die prochiaen in leyden ende si sal offeren soewes dat hoer ghenuecht en onghehouden siin van karsen te brenghen sine wilde dat van gracien doen Ende als men hoer sente jans ewangelie opt hoeft leest soe is si sculdich den prochiaen enen zilueren penning Ende den Coster voer sinen paes enen ouden hollans Jtem soe wat like hier ter kerken coemt van buten der vriheit het si een ghedeghen like of een kint dat sal men brenghen voer der noenen jn zulker tijt dat men daer misse ouer doen mach ende offren als ghewoenlic es Mer coemt een ghedeghen like na der hoghemissen soe zalt verbeyden tote des andren daghes dat men daer misse ouer doen mach Ende wouden die vreende dat lijc grauen recht voert als sijt brachten na der hoghemissen soe zullen si den prochiaen cautie doen een wtleyden daer na te doen of si sullen siin ghemoede daer af hebben Dat [es] te weten Enen ouden groten Ende eest een kint dat lijc dat na der hoghemissen coemt ende men recht voert graeft Daer af sal die prochiaen hebben voer sinen offerande twe oude enghelske Jtem en sal nyemand verbonden noch ghehouden siin tote enighen zeuenden maenghwanden of jaer ghetiden te doen na sinen vriendt ten si dats hem zeluen ghenuecht van gracien te doen Jtem soe wie dat jn der prochie van breda zayet enen viertels zaedt corens of daer bouen die is den prochiaen sculdich te paesken twe broede van volre prouende Ende die beneden enen viertel corens zaeyt es hem sculdich te paesschen een broet van haluer prouende Ende voer elc broet mach men hem gheuen enen ouden enghelsken Ende soe waer men niet en zaeyt daer sal hi hebben van elken paer volcx te paesken enen ouden hollans Ende daer dat bedde ghescheiden is enen haluen ouden hollans Ende des ghelyx vanden ghenen die huysraet houden ende eenloep siin Ende soe waer die prochiaen prouende broet heeft daer en sal hi gheen coster ghelt af eysken Voert zal die coster hebben te kersmisse voer siin recht van prouende broede ende van ghelde jn alle der maniren dat den prochiaen toeghesceiden es dat men hem te paesken gheeft Ende daren bouen zal hi te bamisse gaderen siin coster ghelt Dat es te weten van elken paer volcx enen ouden hollans Ende van wedewen of wedewaren of eenlopen luden die huysraet houden enen haluen ouden hollans Jtem sal die coster hebben van enen ghedeghen like van ludeghelde enen ouden groten Ende van enen kinde enen haluen ouden groten Jtem tote elken feesten als men in der kerken ghewoenlic es te bayaerden twe oude enghelske Ende als men dat Cruys om draghet zoe sal hi hebben vier oude enghelske van bayaerden Ende dit ghelt zal betalen die ghene die an den coster verzoect dat men bayaerden zal
</main>
<end>
Ende om dat wi an allen siden dese declaracie wael ende onverbrekelic houden willen ende ghelouen te houden in goeden trouwe soe es dese brief Jn ghetuychnes besegelt met onse zegle Ende want ic wouter van ykele Coster vorseit seluer ghenen zegel en hebbe Zoe hebbe jc verzoecht ende ghebeden Haren Rombout van yekel Cureyt der kerken van tsgrauenmoer minen lieuen oem Dat hi desen brief voer mi ende jn minen name beseglen wille Ende Jc Rombout van ykel cureyt der kerken vorseit hebbe ouermids bede ende verzoec wouters mijns neuen vorseit minen zeghel an desen brief ghehanghen Dit was ghedaen Jnt Jaer Ons heren M CCC Tachtich ende Een Twaelue daghe Jn Januari
</end>