Compilatiecorpus Historisch Nederlands 1.0 (CHN): ambtelijke teksten 1250-1800: breda_1382_1

<begin>
Wi Wisse vander Havene ende Peter die Bonte scepene in Breda orconden
</begin>
<main>
dat voer ons comen is Zebrecht Thierloet ende bewiesde erfleec den gemeynen convente vanden nonnen cloester te Breda der oerdine van Premonstreyt tote horen reftere vyfthien schellinghe ende neghen penninghe grote tsjaers erflix chyns payments daer deen coman den anderen mede betalen mach te heffen jaerlix uut alsulken onderpanden alse hierna beschreven staen voor die vyfthien schellinge grote erflix chyns payen voerseit die dat convente voerseit te heffen plach op dat huys ende erve ende op die herberghe dimen heyt ter Camere daer Zebrecht voerseit nu ter tyt op woendt ende noch voer ses grote erflix chys payen voerseit die Zebrecht voerseit den voerseiden convente geeft jaerlix voer jaergetyde jonckfrou Aechten was syns eersten wyfs ende jaerlix te gelden plach
Eerst so bewyst Zebrecht voerseit den convente tote synen reefter voerseit acht schellinghe ende ses penninghe grote erflix chyns alsulcker payen tot alsulcken daghe te betalen uut den selven onderpanden ende in alre selver manieren ende voerwerden dat die brief inhout ende begrypt daer dese brief met onse segelen bezegelt doorgesteken es
Voorts so bewyst Zebrecht voerseit den convente voerseit vyf schellinghe ende acht penninghe grote erflix chyns payen voerseit te heffen alle jaer op Sente Martyns dach inden winter uut die schuer ende erve met sine toebehoerten die heer Jan Tierloet toebehoort ende syns vaders plagh te zijn geleghen in de Caterstrate tuschen Wouters erve van Berghen op deen side ende Jan Tierloets erve op dander side Ende al eest dat uut dese schuere voerseit jaerlix uugaen vyftien oude groten die syn heeren Jan Tierloet voerseit anderswaert bewyst te heffen om hem selven mede te quiten gelyck als hi met sinem monbaer voer ons scepene voerseit verlyde
Item soe bewyst Zebrecht voerseit den convente voerseit acht grote tsjaers erflix chyns paeyen voerseit te heffen alle jaer op Sente Martyns dagh inden Winter op dien huuse ende erve daer Goedscalc die Wever in woendt geleghen in de Vischerstrate tuschen Dierick Gruters erve op deen side ende Met Foyen erve op dander side naest den heerenchys daer uut te gheven gelyck alse hem voer ons verlyde
Item bewyst Sebrecht noch den convent voerseit op sente Martyns dach inden winter op dat huys ende erve daer Met Foyen voerseit in woendt daer neven alse voerseit is behoudeleek sulcken commer alse hier met rechte voer uutgoet
Item bewyst Sebrecht noch den convente voerseit tot sinen reefter voor Jonfrou Aechten jaergetyde voerseit ses grote paeyen voerseit jaerlicx te heffen op sente Martyns dagh inden winter op Peter Ysacx huys ende erve geleghen in de gasthuys strate tuschen Willem Heynen soens erve op deen syde ende Rutten Sniders erve op dander syde naeste den heren chise daer uut te gane gelyck als Zebrecht voer ons scepene voerseit verlyde met welcher bewysinghen ham dat gemeyn convent tote sinen reefter voerseit wel lyet ghevueghen ende scanden daer of quite Zebrechts herbeye diemen heyt Ter Camer ende syn erve voerseit gelyck als die brief met des gemeynen convents zegel bezegelt wel inhoudt ende begrypt In manieren dat Zebrecht voerseit geloeft heeft alle dese voerseide onderpande te vryen ende te waren teghen elken mensche ghelyc alse voerseit es ende die bewysinghe ende dien erfchys voerseit daer mede
</main>
<end>
In orconde desen brieve met onsen zeglen bezegelt int jaer ons Heren M CCC tachtich ende twee acht daghe in Meerte
</end>