Compilatiecorpus Historisch Nederlands 1.0 (CHN): ambtelijke teksten 1250-1800: breda_1389_1

<begin>
Wi Peter die Bonte ende Dieric die Rover scepenen in Breda ende late tsheren in Breda orconden ende kennen met desen brieve
</begin>
<main>
dat voer ons comen syn Beatruys Jan Haecx dochter was ende Lysbet haer dochter ende elke met haeren mombaer ende vesten met vonnesse ende met rechte joncvrouwe Lauretten van Oekele der nonnen Claeus dochter was van Oekel haerre moeyen in negen ende twintich oude grote tsjaers erflycx chyns moynten des coninx van Vrancryke item in zes grooten tsjaers erflycx chyns payments daer deen coman den anderen mede betalen mach alle jare te ghelden tote sente Martynsmisse in den winter op alsulke onderpande als hier na bescreven syn uutghenomen alsulc recht als totten alinghen chynse voerscreven hebben mach Claeus Lysbetten broeder voerseit daer Beatruys ende Lysbet voerseit beyde voer gheloeft hebbe ende elke met haren mombaer in rechter vorwaerden so wanneer dat Claeus voerghenoemt tote sinen mondighen daghen comen is dat si hem daer op sullen doen vertyen metten rechte van welken voerseiden chynse Jan Ysbrant jaerlycx gelt sestien oude groote uut eenre weyden die hi heeft liggen int hooghehoute neven Lambrechts erve van Helvoert streckende van voren ter straten tote achter der nonnen goede toe naest den heren chynse daer uut te gane Voert so ghelt van de voerseide chynse Jacop van den Dyke twelve oude groote tsjaers uut sinen huyse ende erve alre eerst daer uut te ghane ghelegen in die zantstraete tusschen heeren Aernds Bynstroes huysinghe was ende erve op deen side ende Ghybe Fraays erve op dander side Item so ghelt van de voerseide chynse Heynric Zwerte ter Taeteringhe eenen ouden groote tsjaers uut der helft van eenen erve dat men heyt Alyten hoefken t[er] Taeteringhen gheleghen aen die strate neven Heynricx weyde voerseit alre eerst daer ut te ghane Item die zesse groote tsjaers ende eenen [] Ende die neghen ende tertich groote tsjaers erflicx chyns payments voerseit ghelt jaerlycx heer Jan Tierloet uut dier huysinghe ende erfnessen met haerre toebehoerten teghen die kerke over gheleghen neven Wouter Roevers huysinghe ghelyc dat die scepenbrief inhoudt ende begrypt in latine bescreven sprekende op Claeuse van Oekelen joncvrouwe Laurette vader was ende die si onder heeft welke voerseide chyns Beatruys en hare dochter voerseit en elke met haren mombaer gheloeft te hebben te vryen ende te waren op die voerseide onderpande in alre manyeren dat voer [] sulker voerwaerden als si voer Claeuse voerseit gheloeft hebben ghelyc dat voer ghevoert is
</main>
<end>
In orconden desen brieve met onsen zeghelen bezeghelt Int jaer ons Heren M CCC ende neghen ende tachtich achthien daghe in Augusto
</end>