Compilatiecorpus Historisch Nederlands 1.0 (CHN): ambtelijke teksten 1250-1800: breda_1402_1

<begin>
Wy Peter die Bonte Dieryc die Rover Gerryt Reysenaelden ende Peter Poelman schepenen in Breda doen condt allen luyden
</begin>
<main>
dat wy by rade ende goetduncken Foeykens Foeykenssoen drosset slans van Breda ende Willems van Oesterzeel rentmeester te Breda daerby ende over geweest hebben dair die coepbacker van Breda maecten ende ordineerden by onsen consente van tsheeren ende van der stadt wegen aldusgedaen coren te houden ende te hebben in haer ambacht als hierna bescreven sijn ende die altoes te minderen ende te meerderen te veranderen ende te verbeteren by den heere ende by der stadt als het dat orbaerlicxste duncket
1. In den yersten dat nyemant in haer ambacht sijn en sal tensy dat hy te voren poerter sy
2. Item sullen die koepbackers op goet gewichte ende op goede coeren backen by ordinanciën van den heere ende van der stadt
3. Item en sal niement de coep backen oft doen backen dat hy voert vercopen wille hy en sal sijn in den backerambacht op die boete die hier gescreven staet
4. Item soe wie van desen dage voert in den backerambacht comen wille die sal geven den ambacht twee ryael
5. Item mach elcx backers kynt meyster werden om enen ryael
6. Item is den backeren geconsenteert dat sy kiesen mogen eenen deken ende daertoe hoerder twee die men van tsheeren wegen daertoe eeden sal om dat ambacht mede te bedriven ende te regeren ende als sy dat ambacht te gader willen hebben soe sal men elken meyster een wete doen ende die dan dair niet by en coemt die verboert 16 zwerte
7. Item sullen die deken ende die twee bedrivers macht hebben dieghene te eeden die int ambacht sijn of yement jeghens dese coren gedaen heeft dat sullen sy voert aen den heere brengen ende so wye daerin bevonden wordt dat sy yeghens die voerscreven coren gedaen heeft die sal verboeren 2 ryael derdendeel den heere een derdendeel der stadt ende een derdendeel den ambacht
</main>
<end>
In kennisse der waerheit soe hebben wy schepenen voerscreven desen brief bezegelt int jaer ons Heeren duysent vierhondert ende II 17 dage in Junio
</end>