Compilatiecorpus Historisch Nederlands 1.0 (CHN): ambtelijke teksten 1250-1800: breda_1419_1

<begin>
Wy Harman van Zeelbach gheheiten van Meloe drossate tot Breda Gheryt Reysenaelde Jacop van den Wingaerde Ghijsbrecht Piggen ende Jan van Gagheldonck Huyghemanssone scepenen in Breda doen condt allen luyden
</begin>
<main>
dat wy dairby ende over waren dat geordineert ende gemaect sijn by den heere ende by der stadt alselke koeren als hierna bescreven staen dairmede dat die vysschere hoir ambacht regeren ende houden sullen ende altoes op een verbeteren by den heere ende der stat
1. In den yersten dat elc vischere die poerter es bynnen Breda ende int ambacht es laten sal hier ter merct uut sinen scepe der stat te coepene acht cabbeljau twee hondert scelvische sesse manden scollen een tal bollicx ende twe dusent heerincx maer elc vreemt vischere die daer ter merct coemt die sal der stat half soeveele laten van elcx als voirscreven es
2. Item soe en sal gheen man visch vercopen hetzy levende versch oft gesouten hy en sta daermede op die merct uutghenomen tsheeren ende der stat water
3. Item soe en sal gheen man vische vercopen die niet 1 en leeft hy en sy yerst gecoert noch heiten ghecoert dan die men voir ogen siet ende die op die merct coemt
4. Voirt sal hem die heer setten twe koermeystere die den vysch werderen sullen
5. Item soe wat vischere hier heerinc te coep brengt weder hy van bynnen sy oft van buyten die mach dairmede staen op die merct alsoe lange als hy wille mer van elken dusent dat hy vercoept sal hy geven eenen brabantschen uutgheset van tonne heeringe dair en sal die koer niet af houden
6. Item van elken last buckincx dat te hanghe gaet sullen sy gheven eenen groten
7. Item van elken hondert cabbeljauws dat sy vercopen sullen sy gheven eenen groten
8. Item van elken hondert scelvisch enen brabantschen
9. Item van elken salm die sy vercopen enen brabantschen
10 Item van elker mande bollicx die sy vercopen eenen brabantschen
10 Item van elker manden schollen die sy vercoopen 2 enen hollantsche penning
11. Item van enen kaer aele oft palinghe enen ouden zwerte
12. Item van enen kaer buthe enen ouden zwerten
13. Item van twelf vloten een butken
14. Item van vive ende twintich elfts een butken
15. Item van een hondert rochen een butken Ende alsoeveele als sy min vercopen van elcx dan voirscreven es alsoeveele te min sullen sy na den ghelande gheven dairaf
16. Item hadde enich man vysche te vercopene ende hy se loechende hy waers op vijf scellinge
17. Item soe wat vysche die men die merct ontseegt diene daerenboven vercoept verboerde twintich scellinghe Ende nyemant en mach doden vysch vercopen sonder besien van den koermeysters ende es die vysch quaet soe sal men int water werpen op vijf scellinghe
18. Item soe wat man van buyten oft van bynnen met ryviervische ter merct coemt die sal daermede staen selve alsoe langhe als hy wille
19. Item soe wat vreemde coepman van buyten coemt oft wat man die bynnen es ende vysch ter merct brengt die sal dair selve eenmael mede staen ende dairenteynden metten hope vercopen ende men salle veylen int openbair
20 Item en sal nyemant vysch mynen dan een man ende die man mach eenen wive wail mededeylen dat hy coept opt dat hoir man int ambacht was ende niet meer dan sy twe en moeghen aen enen coepe deylen ende woirdt dairin bevonden datter yement meer aen deylde dat wair op twintich scellinghe
21. Item zo wye vysche coept die sal den vercoepere betalen bynnen daighslichte op twintich scellinghe
22. Item en sal gheen vyschcoepere met vysche staen ter merct dien vysch te vercopene hy en sal bliven bynnen den hoec van Willem Reyners huyse was ter merken waert aen ende alsoe lijnderecht over op dander syde van der straten Ende soe wye hierbynnen stonde ter kerken waert die verboerde enen ouden schilt alsoe dicke als hy dairaf gecalengiert woirde
23. Item soe en sal nyement den coepman tieghentrecken bynnen den lande van Breda om vysche te coepene meer men sal den coepman sijn vysch ter merct laten brenghen ende dan vercopen na der manieren voirscreven op twintich scellinghe
24. Item soe moeghen die koermeysters oft enich man die van den gherechte es dese voirseyde broeken calengieren ende dat sullen sy brenghen aen den heer
25. Item soe en sal nyement int ambacht comen hy en sy poerter
26. Item soe wye int ambacht comen wille die sal gheven twe oude schilde te weten eenen halven 3 den heer ende den anderen halven 4 der stat ende enen ouden scilt 5 den ambachte
27. Item als voirseyt staet dat soe wat coepman van bynnen oft van buyten met vysche ter merct coemt dat hy dair zelve een maele oft twe mede staen mach oft hy wille behoudelic altoes in allen den stucken ende puynten voirseyt den heer sinen rechte te behouden
</main>
<end>
In orcond ende ter kennesse deser dinck soe hebben wy Herman van Zeelbach drossate tot Breda voirseyt Gheryt Reysenaelde Jacop van den Wijngaerden Ghijsbrecht Pigghen ende Jan van Gagheldonck Huyghemanssone scepenen in Breda desen brief met onsen seghelen besegelt int jair ons Heeren M vierhondert ende neghentien drie daghe in Merte
</end>