Compilatiecorpus Historisch Nederlands 1.0 (CHN): ambtelijke teksten 1250-1800: breda_1443_1

<begin>
Wy Wouter van Beversluys schoutet tot Breda opt dese tijt in absenciën ende in den name des drossaten slans van Breda by wille ende goetduncken der edelre Johanne grevinne tot Nassouw ende tot Vyanden vrouwe ter Leck ende tot Breda ende wy Jan van Tsolle Jan van Nedervene Raes die Jonghe Henric Cristus schepenen in Breda doen condt allen luyden
</begin>
<main>
dat wy daerby ende over gheweest hebben daer geordineert ende gemaect wairden by den heere ende der stadt alsulcke koeren als hierna bescreven staen daermede dat die tymmerluyden ende metssers tot Breda hoer ambacht regeren ende houden sullen ende altoes op een verbeteren van den heere van den borgemeesteren schepenen ende gezworen ende te veranderen soe wanneer dats hem genuegt
1. In den yersten soe wie int voerscreven ambacht comen wille ende meester worden wille ende wercken wille met bylen met sagen oft met trouwelen die sal yerster poerter sijn ende geven den ambachte 1 twee oude schilden den eenen ouden schilt den heere ende die stadt den anderen ouden schilt sal hebben dat ambacht
2. Item soe wie dat dit ambacht leeren wille die sal geven den ambacht alleen drie oude grote
3. Item als een meesterskijnt dit voirscreven ambacht leeren wille dat en sal niet geven van leeren
4. Item als een meesterskijnt meester worden wille die sal geven 6 oude grote te weten den heere 2 oude grote der stadt 2 oude grote ende den ambacht 2 oude grote
5. Item soe wat manne dat van buyten coemt werken die sal geven elke weke den ambacht eenen halven oude grote
6. Item een dienstknecht sal geven den ambacht elke weke een vierendeel van eenen ouden grote ende en werct hy niet die weke al uut sal hy geven van den dagen die hy werct ende na den beloop van den voirscreven wercgelde ende des soe sal hy mettenghenen comen die hy wercken sal aen die regeerders van den ambacht ende gevent hem te kennen ende betalen alst werck gedaen is ende oft hy des niet en dade ende die regeerders daerover croenden dat soude sijn tsheeren belyef elken dagh die hy gewacht hadde op 1 1/2 oude grote ende onvermindert den ambacht hoer gelt
7. Item als men ghemeyn heervaerden voer soe sullen die meesters ende tymmerluyden die dan thuys bliven den ambacht geven elcx daeghes den derden penninck van hoerder dachhueren opdat sy in dachhueren wercken ende die in taswercken wercken die sullen geven eenen grote Brabants des daeghs diewile dat sy werken ende hoer gesellen uut sijn
8. Item sullen dese metssers ende tymmerluyden een redelic werckgelt setten mogen in des ambachts oerbaer te bekeeren op alle dieghene die int ambacht sijn
9. Item hiertoe sal hem die heer eenen man setten die hoer deken sijn sal ende die heer sal dienselven deken eeden om dese koeren in te panden ende anders des ambachts orbaer te doen ende dairtoe sal dieselve deken kiesen twee mannen uutten ambacht daer men dat ambacht by regeren sal ende wes die drie doen tot des ambachts behoef dat sal vaste ende gestade sijn Ende waert tsake dat dese deken den ambacht niet nutte en ware soe sal hem die heer eenen anderen setten
10 Item soe wie een kenlic wete heeft ende by den ambacht niet en coemt alse die deken te zamen hebben willen die verboert 18 penninge zwerten
11. Item soe sal die deken metten tween gezworen elcx jaers den heere ende der stadt ende den ambacht wittigen rekeningen doen van den broken ende van dat daer elcx jaers af comen sal van den punten voerscreven
</main>
<end>
In orconden desen brieve met onsen zegelen besegelt int jaer ons Heeren duysent vierhondert XLIII 20 dage in Junio Item soe is geordineert gewilcoert ende gesloten metten deken gezwoirene des ambachts voirseyt ende oic metten gemeenen consente ende wille der goede mannen van den ambacht 2 gesturven ende van live ter doot comen were metten gemeenen ambacht ende hem een wete metten cnaep des ambachts gedaen ware sal verboren eenen lelyaert ende dat gelt sal die deken ende gezworen keeren in orbaer ende profijt des ambachts voerseyt 3
</end>