Compilatiecorpus Historisch Nederlands 1.0 (CHN): ambtelijke teksten 1250-1800: breda_1446_1

<begin>
Int jair ons Heeren dusent CCCCXLVI 28 daghe in December wairt gheordineert bi den heere ende bi der stad ende oeck bi den mannen ons liefs ghenedichs jonckere greve tot Nassou ende tot Vyanden here van den lande van Breda al dusdanighe koren te houden als hierna bescreven staen
</begin>
<main>
1. 1 In den eersten soe sal nyemant wie hi si onder onsen genedigen jonker gheseten oft erve ende goet daironder hebbende deselve sijn erve oft goeden becommeren ofte vertieren in geenre wijs met enigen brieven oft voirwairden dan met brieven van den bancken des lants van Breda dair si onder ghelegen sijn Ende oft yemant dairenboven bevonden worde dat soude sijn also dicke alst gesciede op een broke van twintich oude scilden deen helft dairaf tot ons ghenedichs jonckeren behoeff dander helft sal bekeert worden half ende half der kercken van Breda ende denghenen diet aenbrengt 2
2. 3 Item soe wie buyten den lande van Breda enighe schout ghelooft heeft ende schuldich is die sie dat hi vernueghe ende betale tot sinen daghe also datter onsen genadigen jonckere noch sinen dienaren noch oec sinen ondersaten gheen claghe cost noch last af en come ende oft yemant dairenboven versumelijc worde ende onsen ghenedighen jonckere enighe brieve dairaf quemen soe sal die diener denghenen die die schult schuldich is dat aen dien schulder of sinen huse te weten doen ende eest dan dat die sculder voirscreven binnen thien daghen nadat hem die wete also ghedaen is niet en voldede datter meer clachten of brieven af quemen dat sal wesen alsoe dicke alst gesciede op een broke van thien ouder schilde ende dairtoe sal hi moeten ghelden alle den cost ende schade die onsen genadigen jonckere oft sinen dienaren oft enich van sinen ondersaten dairom toecomen mach ghelijc den principalen ende sonder enich verdrach 4
3. Item soe sal elc van ons ghenadichs jonckeren schouteten ende elc in sinen bedrive dese voirscreven punten wael ende volcomelijc tallen tide ondersueken ende den luden vercondighen in der maten voirscreven ende eest dat si dairaf in ghebreke vonden worden ende dairmede simuleerden dat sal wesen also dicke als valt op een broke van 10 ouder scilde tot ons ghenedighs jonckeren behoeff voerscreven 5
</main>
<end>
</end>