Compilatiecorpus Historisch Nederlands 1.0 (CHN): ambtelijke teksten 1250-1800: breda_1447_1

<begin>
Wy Adam van Nyspen drossate van den lande van Breda ende wy Jan van Nedervenne Willem van Laerhoven Willem van Nyspen ende Aert van Tollousen scepenen in Breda doen condt allen luden
</begin>
<main>
dat wy daerby ende over gheweest hebben dat gheordineert ende gemaect waren by den heere ende by der stadt alsulcke keuren als hierna bescreven staen dairmede dat die crameren van Breda huer ambacht regeren ende houden sullen ende altoes op een verbeteren van den heere van den boirgemeesteren scepenen ende gezworen ende te veranderen zo wanneer dats hen genuecht
1. In den yersten dat nyement int voirscreven ambacht wesen en sal hy en sy porter tot Breda ende bynnen der vierscharen van Breda woenende
2. Item en sal nyement int voerscreven ambacht niet wesende met schalen oft met ghewichte wegende mogen verkoopen kazen boeter noch speck rosel ruet potasschen wreasschen alluyn hersse kerssen kemp zeepe vighen rossinen behoudelijc dat een yegelyc vercoopen mach int groot oft int gheheel
3. Item en sal niement gheenrehande smout edic mostaert peck terre haringsmout noch gheenrehande vetware vercoopen met maten oft ghewichte hy en sy int voirscreven ambacht
4. Item en sal nyement gheenrehande merserie vercopen te weten ransten zyde saeye fustayn bottayn woestayn noch vorckerac metter ellen noch anderssins hy en zy int voerscreven ambacht behoudelic dat die cledermakers die int cleedermakerambacht tot Breda sijn sullen mogen vercoopen fustayn dat sy selve bynnen hueren huyse snyden ende naeyen sonder arghelist
5. Item en sal nyement gheen witleeder noch rudeleer dat der crameryen toebehoirt ende dat met alluyn gemaect is werken noch oic rootleer werken oft maken noch oic hansschoen buydel remen nastelen maelderye zeelen laste wanne aessacken maken oft vercoopen hy en sy int voerscreven ambacht
6. Item en sal nyemant gheenrehande cruyt loot oft stael ongewracht vercoopen hy en sy int voerscreven ambacht
7. Item en sal nyement loockaywijn raepkoeken oft ander koeken noch twijn vercoopen hy en zy int voirscreven ambacht
8. Item en sal nyemant gheenrehande cruyt noch poeyer vercoopen dat ghevelst is noch gheenen verwpoeyer vercopen hy en zy met sofferaen geverwt ende die daerteghen dede ende daer bevonden worde van den ghezwoirenen die soude verbeuren dat cruyt oft poeyer ende dairtoe eenen ouden schilt dat een derdendeel den heere dander derdendeel der stadt ende dat derde derdendeel den ambacht
9. Item en sal nyement van den crameren gheenre kerssen maken noch vercoopen sy en sijn gemaect van cathoengaren ende van goeden lofbaren ruet ende soe wie dat kerssen maecte van quaden ruete om te vercoopen ende die gheswoirne hem dairaf calengierden die souden verbeuren twie pont was tot sinter Claeus behoef alsoe dicke als men dat bevonde behoudelic dat een yeghelic poorter sijn kerssen sal mogen maken oft doen maken voir sijns zelfs provande
10 Item zo wat vreemde cooplude van buyten comen in der stadt van Breda die sullen hebben hueren vryen marctdach
11. Item zo wie int voirseyde ambacht is die en sal in gheen ander ghesworen ambacht mogen sijn maer hy sal mogen doen portersneringe dats te weten laken reyden coren vercoopen mede blanden hout vercoopen oft ander portersneringe ende oft men bevonde dat yement van der crameren anderen gheswoiren ambachten deden die souden verbueren drie oude schilde also dicke als men dat bevonde deen derdendeel den heere dander derdendeel der stad ende dat derde derdendeel den ambacht uutgenomen die nu op dese tijd cramers sijn en in anderen gesworen ambachten sijn die sullen dairin mogen bliven huer leefdaghe lang
12. Item zo wye int voirseyde ambacht comt die sal geven twee oude schilde deen derdendeel den heere dander derdendeel der stad ende dat derde derdendeel den ambacht ende dairtoe sinter Claeus twe pont was ende den gheswoirnen een gelt wijns
13. Item eens cramers kijnt sal int voirseyde ambacht mogen comen met halven ghelde
14. Item oft een cramer storve ende sijn wijf eenen anderen man name die sal int ambacht bliven met halven ghelde mair nam sy eenen anderen cramer soe soude hy vry bliven int voirseyde ambacht
15. Item so sullen die goutsmede ende tennenpotgieters tot Breda die nu sijn ende porters tot Breda sijn int voirseyde ambacht wesen zonder eenich onghelt te geven dan alleen sinter Claeus twe pont was
16. Item so sullen staen die cruyeniers ende die maeldeniers voir den grooten roester ter Plaetsen waert op deen tegen dander over ende die van buyten comen sullen staen dair teynden aen deen teghen dander over sijn sy ghedect oft niet
17. Item die merserie vercopen sullen staen beneden den grooten roester deen tegen dander over ende die van buyten dair teynden aen sijn sy ghedect oft niet
18. Item die vetware vercopen sullen staen beneden den put thegen den coer over nederwaert deen tegen dander over ende die van buyten comen sullen staen dair teynden aen Mair oft yement ware die voir sijn doire voirt doen woude die mach voert doen voir sijn doire ombegrepen
19. Item so sullen die cramers loten tot twe tyden tsjaers te weten des Maendaighs voir Pinxten ende des Maendaighs voir Bamisse ende oic so sullen die cramers loten des Maendaighs voir Vastelavont dair sy die vasten uut staen sullen deen tegen dander over ende wye alsdan dair niet en quame tot dyer hueren dat hem die ambachtscnape die weten gedaen hadde die soude dan verliesen sijn lotinge ende dan staen teynden den anderen die geloot hadden
20 Item oft yement dit voirseyde ambacht dede oft hantierde die int voirseyde ambacht niet en were ende dairinne bevonden werde die zoude verbueren eenen ouden schilt alzo dicke als men dat bevonde deen derdendeel den heer dander derdendeel der stad ende dat derde derdendeel den ambacht
21. Item die crameren sullen hebben twe ghezwoirne uten ambacht ende die sal hen die heere eeden dit voirseyde ambachte te regeren in den manieren voirseyt ende dieselve gesworen zullen elcx jairs den heere der stad ende den ambachte voirseyt sculdich zijn rekeninge te doene van den broeken die dairaf vallen sullen ende die voirgenoemde gezwoirne sullen elcx jairs by den gemeynen ghesellen van den voirgenoemden ambacht kiesen twe andere ghezwoirne ende wes dieselve ghezwoirne doen tot des voirgenoemden ambachts behoef dat sal vaste ende gestade zijn
22. Item so sullen die voirgenoemde gezwoirne alle dese punten oversien oft yement sijn goet dat hy vercocht van eenigen dat voirseyt steet velste ende dair anders yet aen dede dat niet oprecht en were ende die sullen sy calengieren ende diegheene die dairinne bevonden worden sullen dairaen verbueren alzo dicke ende menichwerf als men dat bevynden sal connen eenen ouden schilt ende dairaf sal die heere hebben een derdendeel de stad dander derdendeel ende dat ambacht voirseyt dat derde derdendeel ende dat sullen die gezwoirne den heere aenbrengen
23. Item oft yement van den voirseyden ambacht broecte int tgene dat voirzeyt staet die breuken zullen die gezwoirne uutpanden met des ambachts cnape
24. Item die ghezwoirne zullen coopen den gemeynre gesellen van den voirseyden ambacht laken ende so wye sijn laken niet en haelde als hem die wete gedaen ware van des ambachts cnape die zoude verbueren twe pont was tot sinter Claeus behoef ende dan zouden die gezwoirne dat laken hen thuys seynden ende dat souden sy dan betalen die dlaken niet en haelde
25. Item so wye sinen covel niet en hadde noch niet mede en ghinc offeren gelijc gewoenlic is oft dat een die int voirseyde ambacht ware het ware man oft wijf storven ende die dan oic niet en quamen offeren noch mede om en ghinghen gelijc gewoenlic alzoverre sy in der stad dienst oft in des Heyligen Cruys dienst oft int tsheeren dienst niet en sijn die souden verbeuren telken male twe pont was tot sinter Claeus behoef
</main>
<end>
In orconden desen brieve met onsen zegelen besegelt int jair ons Heeren dusent vierhondert zeven ende veertich zesse daghe in Aprille
</end>