Compilatiecorpus Historisch Nederlands 1.0 (CHN): ambtelijke teksten 1250-1800: breda_1448_1

<begin>
Int jair ons Heeren duysent vierhondert XLVIII 29 dage in April werden geordineert by den heere ende by der stad ende oick by de mannen ons liefs genedichs jonckeren Johans greven te Nassouw heere van den lande van Breda aldusdanige koren als hierna bescreven staen
</begin>
<main>
1. Item zo wie eenigen gront van erve vercoopt ende eenigen voircommer oft andere lasten van medepandscapen oft dyengelike verswijght ende den cooper alzo in eeniger manieren bedrieght die sal schuldich wesen denselven verswegen commer af te doene terstond zonder des coops cost ende oft hy denselven voircommer alzo niet gecrigen noch afgedoen en conste zo zal hy dairvoire den cooper geven voir elken penninc van den thijnse ende pachte alzo verswegen ende voiruutgaende met volder betalingen van allen verschenen terminen twintich gelike penninge ende van den anderen lasten van medepandscapen oft dyergelike dairaf sal de vercooper den cooper alsulken vasticheyt doen ende setten als den scepenen van der banc dair de goeden gelegen sijn redelic sal duncken oft hy sal den cooper sijn gelt wedergeven opdat de cooper des beghert
2. Item desgelix zo wie yemende erfflike oft lyftochtrente oft pachte vercochte op gront van erve ende eenigen voircommer oft andere lasten van medepandscapen gelijc voirscreven is dairop verswege ende den cooper alzo in eeniger manieren bedroge die sal schuldich sijn denselven verswegen voircommer ende lasten terstont af te doen in der maniere bovengescreven oft den cooper sijn gelt weder te geven met allen verschenen terminen
3. Item so wye hierinne bevonden sal worden dat hijt wetens gedaen sal hebben ende de heere dat deuchdelic can bewysen die sal verbeuren alzo dicke alst bevonden sal worden tot tsheeren behoef den hooghsten breuc van 60 ponden
4. Item ende oft de heere geen bewijs dairaf en can gedoen ende de vercooper seggen woude dat hijt onwetens gedaen zoude hebben dairaf zal de vercooper sinen eedt moeten doen ende hem dairaf ontschuldigen oft anders zoude hy den voirscreven breuc moeten geven ende nochtan den cooper vernuegen gelijc voirscreven is
5. Ende zo wye voir desen tijt yemende bedrogen hadde in der manieren voirscreven die sal schuldich sijn synen cooper dat te kundighen ende dairaf tevreden te setten tusschen dit ende Bamisse naistcomende oft anders alzoverre als de vercooper des niet en doet oft ten minsten den cooper des niet en kundicht zo sal dat gehouden ende geacht worden ghelijc oft hierna geschiet ware ende alzo hierboven gescreven steet
6. Item zo wat commer chijns oft pacht die bynnen 30 jaren niet betaelt noch kenlic gemaent en hadde geweest opte pande medepande ofte onderpande na inhout der scepenbrieve die dairaf weren alle alsulken commer chijns ende pacht sullen doot sijn ende de brieve dairaf van geene weerden
7. Item alzo de lude tot hiertoe nuchteren monds hueren nootsin hebben moeten thoenen ende hueren goede ontsetten zo zullen zy voerdaen dat mogen doen bynnen drie dagen
</main>
<end>
</end>