Compilatiecorpus Historisch Nederlands 1.0 (CHN): ambtelijke teksten 1250-1800: breda_1476_1

<begin>
Hierna volghen zekere punten die by den heere by der stadt ende der hootbancken des lants van Breda overdraghen ende gesloten sijn om voirdaen voort voir recht gehouden te wordden bynnen der stad ende lande voirzeyt ende openbairlic uutgelesen ende gekundicht waren opten Sondach 11 dage in Februario int jair 1476
</begin>
<main>
1. In den yersten als yement eenen anderen gequetst sal hebben bynnen der stad oft lande voirscreven dat dan de mesdadige dat sal moeten doen vreden ende sijne ernsticheit dairom doen oft doen doen den heere bynnen 24 uren op een boete van 20 sc zwerte totter heerlicheit behoeft van Breda te verbueren alsoe dicwijls alst de mesdadige menigen dach ongevreedt sal laten staen ende dat dieselve mesdadige denselven vrede die dueren sal zesse weken lang weder sal doen vermissen van zesse weken tot zesse weken op een gelyke boete te verboeren als vore totdat de soene ende de beteringe van der voirzeyder quetsuren sal sijn gemaict Ende oft die soene ende beteringe niet gemaict en wordde bynnen den yersten zesse weken nadat de gequetste weder straetgangich sal hebben geweest dat dan deselve gequetste de beteringe dairaf met rechte sal moigen heysschen voirt gerichte dair de mesdaet onder geschiet alsoeverre als hy den mesdadigen aldair te rechte can gecrigen oft indien hijt dair niet te rechte en can gecrigen voir eenich ander gerichte dair hem dan sal gelieven
2. Item dat van dootslagen ende anderen quetsueren alle onsculdige mage op hueren vrede vry ende ongelast van der dooder ofte gequetster zyden sullen bliven ende oft yement sulken maegh oft anderen dair hy tegen in vrede stonde van dootslage oft van quetsueren wachte dreyghde oft merkelic anxstineerde sonder quetsen dat hy dairaen verbueren sal totter voirzeyder heerlicheit behoef alsoe dicke alst geschiet 60 pont swerte
3. Item dat van nu voirdaen bynnen der voirzeyder stad dorpen ende lande van Breda alle erfgoede int scheyden van den bedde gaen ende versterven sullen totter zyden dair zy af sullen zijn gecomen behoudelic den langhstlevenden zijnre tocht in dieselve erfgoeden soet na der gewoenten van der plaetsen dair zy zullen zijn gelegen sal behoiren behoudelic oick oft de have by den aflivigen achtergelaten niet goet genoich en were om sijn scult mede te betalen dat men dan tgebreck van der scult aen d'erve van beyden syden sal moeten nemen
4. Item dat van nu voordaen in allen deylingen van erven ende van haven bynnen der voirgenoemden stad ende lande gelegen de doode hant metter levende sal mogen deylen
5. Item dat een man sijns wijfs erfgoet bynnen der voirseyden stad oft lande gelegen sonder huer consent niet en sal moigen vercoopen oft belasten ende dat men dieselve erfgoede voir huere mans sculden oic niet en sal moigen uutwinnen oft vercoopen des mans erfgoede huer beyder have ende vercregen goeden en sullen yerst dairom vercocht ende in de voirgenoemden sculden bekeert moeten sijn
6. Item als vader ende moeder bynnen der voirgenoemden stad ende lande geseten een kijnt uutgehilict sullen hebben dwelke sterft sonder wettige gebuerte achter te latene dat dan dieselven kijnts achtergelatene haeffelyke ende erffelyke goede op vader ende moeder sullen versterven ende op nyemande anders ende oft de vader oft oic de moeder doot weren dat dan de lestlevende niet meer dan deen helft dairaf en sal hebben
7. Item dat van nu voerdaen in alle gedingen die bynnen der stad ende lande van Breda sullen gescien een verweerder sijn beraet sal mogen hebben 14 daighe lanck om tantwoorden alsoeverre alst den gerichte na gelegentheit van der zaken behoirlic dunct wesen
</main>
<end>
</end>