Compilatiecorpus Historisch Nederlands 1.0 (CHN): ambtelijke teksten 1250-1800: breda_1479_1

<begin>
Opten tweentwintichsten dach van Meerte int jair ons Heeren duysent vierhondert negenentzeventich hebben heer Enghelbrecht greve te Nassouw ende tot Vyanden heere tot Breda enz ende die borghermeesteren metten geheelen gerichte van Breda voirseyt gegont ende geconsenteert
</begin>
<main>
Cornelize van Bruheze ende synen erven die poorte in de Steenstrate geheyten die Waterpoorte om die poorte erffelic te gebruyken te tymmeren ende te oirboren tot synen meesten proffyte behoudelick dat hy de voirseyde poorte sal houden in goeden reparatiën alsoo dat behoort oic mede oft de stad van Breda voirseyt belast wordde het waere by oirloige oft anderen nootlyken zaken dat die voirgenoemde Cornelis oft sijn voirgenoemde erven alsdan altijt zullen oepenen die voirseyde poorte ende laten gebruyken den voirgenoemden heere Enghelbrecht zynen erven ende nacomelingen heeren tot Breda voirseyt ende den borghemeesteren ende gerichte van Breda voirseyt totter voirseyder stad behoef nu ter tijt sijnde ende naemaels wesende alsoe dicwijls des van noode sal sijn oft oic gebuerde dat de voirgenoemde Cornelis oft sijn erven sijn andere huysinge vercochte so en sullen zy die voirgenoemde poorte niet mede moigen vercopen mer altijt sal die voirgenoemde Cornelis oft zijne erve die voirgenoemde poorte gebruyken in der manieren voirseyt
</main>
<end>
</end>