Compilatiecorpus Historisch Nederlands 1.0 (CHN): ambtelijke teksten 1250-1800: breda_1481_1

<begin>
Ter welvairt van der stadt ende ingesetenen van Breda ende om gemeynen oirboir voirt te setten is met goeden wysen rade dairop te voren gehadt by den heere ende gerichte ende oic by consente van den eerwerdigen heeren deken ende capittel ende anderen geestelicheyt van Breda geordineert overdragen ende gestatueert onderhouden te wordden tot eewigen dagen tgene dat hierna volght
</begin>
<main>
1. Ierst dat men voirtaen alle erfrenten thijnsen ende pachten staende oft veronderpant op huyse bynnen der stad ende vryheyt van Breda die weerlike personen heffen sal mogen lossen ende afquiten na der betalingen die men dairaf tot noch toe gedaen heeft betalende voir elken penninck voirseyt sesthiene gelijcke penninge ende voir elc sester rogs vivendertich Rijnsgulden tstuck van 40 groten Vlems ende altijt metten termyne die na der lossingen ierst verschinen sal allene heeren gront chijns uutgenomen
2. Item dat men alle erfrenten chijnsen ende pachten die gheestelike personen cloesteren ende geestelijcke plaetsen heffen opte huyse staende bynnen der stad ende vryheyt van Breda voirzeyt bynnen dertich jaren herwairts beset gecoft oft vercregen sal mogen afwysen op andere goede onderpande bynnen der vryheyt van Breda oft bynnen der milen omgaens gelegen goet genoech zijnde ten pryse van scepenen oft dat men den erfchijns sal mogen lossen ende afquiten te weten elken penninck met achthiene gelijcke penninge ende elck zester rogs met viertich Rijnsgulden eens van der weerden voirseyt ende altijt metten termyne die na der afquitinge ierst sal verschinen uutgenomen allene die goede behorende totter fundatien van eenige beneficien behoudelic diegheene die eenige renten chijnsen oft pachten sullen willen afquiten gehouden sullen sijn dat een jair te voren te verkundegen den deken ende capittel van Breda alsoeverre alst onder hen behoirt ende ten eynde van den jare die penninge in eenre geheelder sommen te brengen ende over te leveren in hueren handen met der verschenender renten gelijc voirseyt is om buyten der stad aen andere onderpande aengeleeght te wordden ende sullen sulcke goeden die in der voirseyder manieren bewesen oft met penningen van afgelosten renten comende gecoft sullen wordden altijt sijn ende bliven van derselver naturen dat die andere goede waren dairvore dieselve goeden bewesen oft gecocht sijn
3. Item voirtaen dat men alle renten die opte huyse bynnen der voirseyder stad ende vrijheyt staende na dese tijt vercoftn oft beset sullen wordden sal mogen lossen altijt elcken penninck met thien gelijck penningen
4. Item dat alle dieghene die voirdaen sullen willen tymmeringen nyeuwe huysen oft nyeuwe dack leggen bynnen der mueren van der stad ende opten Haeghdijck bynnen poirten sullen moeten decken met haerden daecken hetzy met tegelen oft met leyden ende dairvoir sal die stad eenen yegeliken geven te weten voir blaeuw merten twelf sc Vlems item voir ander blaeuw leydack 8 sc Vlems van elken dusent ende voir elc dusent tegelen 14 stuivers ende die dat niet onderhielde soude verbueren hondert scell half den heere ende half der stadt borgemeesters ende nochtans sijn dack wederom af moeten breken ende met haerden daeck decken ende oft yemandt dairinne gebrechlic were die sal verbueren die voirseyde pene van hondert scell alsoe dycke ende menichwerven als hy clairaf gecalengiert wordde by den heere oft van sinen wegen
5. Item dat nyemant bynnen der stad noch opten Haeghdijck en sal mogen uutsteecken besyden aen die huyse enige roeckgate ende dat diegene die enige alsoen uutsteken ende gemaict hebben die sullen moeten afbreken tusschen nu ende sente Jansmisse naistcomende om te verhueden de periculen van brande die dairaf soude mogen gebueren op de pene voirseyt alzoe dicke ende menichwerven als sy gecalengiert wordden gelijc vore
6. Item dat men oic alle lijftochte renten ende chijnsen op husen staende als vore die weerlike oft geestelike personen heffende sijn oic lossen sal mogen op een lijf staende den penninck met 7 gelijcke penningen ende op twee liven met 9 gelijcke penningen na inhoudt der brieve oft die weerde dairvore in anderen goeden gancbaren gelde Ende voir een zester roggen op een lijf 16 Rijnsgulden ende op twee liven 18 Rijnsgulden tstuck te 40 groten Vlems ende altoes metter ierster verschenender renten Dit wert aldus uutgeroepen voir der stadt huys Dominica ante Purificationis Marie
7. Item dat men voirtaen alle erfrenten ende erfchijnsen staende ende veronderpant op huysen bynnen der stad ende vryheyt van Breda die weerlike personen heffen sal mogen lossen ende afquiten betalende voir elc penninck sesthien gelijck penninge gelijc de brieven dairaf die inhouden oft die weerde dairvore in anderen goeden gancbaren gelde ende voir elc zester rogs 36 Rijnsgulden tstuck te 40 groten Vlems ende altoes metter iersten termijn verschinende na der aflossingen behoudelic die erfrenten ende chijnsen dairvore die huysinge met sinen erven yerst uutgegeven zijn voir den jare van vijftich dat men die sal mogen lossen betalende voir den penninck twintich gelijcke penningen als in den brief begrepen staen oft de weerde dairvore in anderen gancbaren gelde ende metten yersten verschenender renten uutgenomen altijt heeren grondchijns
</main>
<end>
</end>