Compilatiecorpus Historisch Nederlands 1.0 (CHN): ambtelijke teksten 1250-1800: breda_1482_1

<begin>
Int jaer ons Heeren dusent vierhondert tweentachtentich opten thienden dach van April is overdragen by den heere by der stad ende by den hootbancken slants van Breda om vordaen voir recht gehouden te worden
</begin>
<main>
1. In den yersten soe wie in eens anders huys comt om dien te slaen oft te misdoen oft by avonde na sonneschijn ende de doren gemeynlic gesloten sijn dat die verboeren sal sijn lijf ende sijn goet al waert oic soe dat hijs niet en quetste ende dieghene die alsoe in sijns selfs huys overladen wordt sal denghenen dies alsoe overlaedt mogen slaen uten huyse sonder yet dairaen te mogen verbueren behoudelic dat hijs niet doot en sla noch en mincke na uutwysen des koerboecks
2. Item in dit punt selen thuysgesin van denghenen die aldus overladen wordt mogen tuygen te weten wijf ende kynderen knapen ende joncwiven sonder dairinne voir partie geacht te wordden
3. Item dat alle deghene die alsulken misdadigen huysden oft hoofden hulpe oft bystant doen verbueren selen totter heerlicheit behoef alsoe dicke alst gesciede tzestich pont
</main>
<end>
</end>