Compilatiecorpus Historisch Nederlands 1.0 (CHN): ambtelijke teksten 1250-1800: breda_1487_1

<begin>
1. Mijn heere wilt ende heeft geordineert met sinen raide dat men dyerste pointe aengaende den erfchijnsen opte huyse sal onderhouden in alle der manieren ende gelijc dat tanderen tyden uutgeroepen is Ende van den anderen punte aengaende der lijftocht heeft mijn heere belieft dat dat oic uutroepen ende voirdaen onderhouden worde gelijc voirscreven staet
</begin>
<main>
2. Ende van denghenen die buyten den lande van Breda geseten sijn ende renten heffen opte huysen bynnen der stad ende vryheyt van Breda die heeft mijn heere aen hem genomen
3. Aangaende den yersten punte van den ordinanciën in dit papier begrepen begynnende yerst dat men voirtaen alle erfrenten enz heeft mijn heere verclaert dat tselve punt slaen sal op huysen staende bynnen Breda ende op deynden also verre als den Steeuwer reyct ende nyet voorder Insgelijcx sal tvoirseyde punt oic slaen op gronden van erven hoven off bogaerden staende bynnen den mueren van der voirseyder stad behoudelic dat de losser gehouden sal sijn bynnen jairs op dien grondt een huys te settene off anders en sal die lossinge van egheender werden zijn
4. Item opten 4en begynnende Item dat alle dieghene die voirtaen sullen willen tymmeren heeft mijn heere verclairt dat hy dat wilt strack onderhouden hebben ende beveelt den drosset schoutet ende burgemeesteren dat sy nyemande en gehengen noch oorloff en gheven eenich nyeuwe stroyen dack te leggen noch oic eenige stoppinge van ouden dake te laten geschieden ten waire dat hy dat oude dack yerst gevisiteert hebben ende die visitacie geschiet sijnde ende sy thuys sterck genoech vijnden om het dack te draghen wilt mijn heere dat men dat oudt dack geheelic ende al afkeuren sal sonder verdrach
</main>
<end>
Dit was aldus gesloten opten 9 dach van April int jair 1487 dair ic by was GHEVAERT
</end>