Compilatiecorpus Historisch Nederlands 1.0 (CHN): ambtelijke teksten 1250-1800: brugge_1265_1

<begin>
De here woutre de grote ruddre De here woutre van caedzant ruddre hugo f willards bouden iserine lonis van boeienghem willem scouthete riquard vander stenkete wi vrie Schepenen doen te verstane al den ghonen die dese lettren sullen sien horen ende lesen
</begin>
<main>
da[t] h[ug]he v[ei] ende woelgard sin wijf quamen vor [o]ns hars danx ende hars willen also alse sit verlieden [ende] [ver]cochten Janne f lamsoets portre van Brugghe iii ghemete lands preter i [line] lettel min jof lichtelic mer dat land leghet in de prochie van sente katelinen te knocken recht zud van das vorseits hus dari in woent die vorseide hughe omme ene summe van peneghen die hem es wel ende wettelike vergouden ende die vorseide hughe ende woelgard daden hem buten des lands ende gauer of wettelike ghifte ende halmedens hem ende ghelouedens hem te waerne te mans leuene ende te landsleghere Ende die vorseide hughe ende woelgard namen dat selue vorseide land van dien vorseiden janne ende van sinen oire hem ende haren oire te erueliken chense omme xlv s elcs jaers das salmen ghelden dene helt te sent baues messe ende dander helt te half marte ende telken dat dat vorse[i]de la[n]d versteruet so est sculdich dien vorseiden janne i pont was ende en vierendeel ponds wasses ende te bliuen houdende dat lant ten seluen chense
</main>
<end>
Ende om dat wi vorseide scepenen willen dat dese dinc si seker ende ghestade ende sonder calaenge so hebben dese lettren gheseghelt met onsen propren seghelen Dit was ghedaen ende ghegheuen jnt jaer als men scriuet tincarnacioen ons heren m cc lxv jnde kalenden van hoiemaent
</end>