Compilatiecorpus Historisch Nederlands 1.0 (CHN): ambtelijke teksten 1250-1800: brugge_1266_2

<begin>
Alle die goene die deise lettren sullen sien
</begin>
<main>
wie Lambret abt van sent andries bi brughe ende onse conuent doen teuerstane dat wie xvij m lands & 1/2 m & xxij 1/2 Roeden van onsen lande dat wie hebben in die prochie van houthawe licghende bi onsen hove ende bi sticken heten al dus Costers lant dat hout iij m & xxxij Roeden & 1/2 Bertolfs lant dat hout v m & i line & xx Roeden Watermeet die hout vij linen & xxiij Roeden ende of suedtalf der watermeet lxxiiij Roeden Echter vi m & i line ende xxiij Roeden die licghen west ouer den wech bider sieker lieden houe die strecken na den weghe die gaet te wendunen waert hebben ghewisselt Jeghen thus van sente marien magdalenen bi brughe ende Jeghen die broeders van den hus Ende Jeghen den here Janne coepmanne Ende Jeghen den here martine van essen meesters van den voer seiden huse Omme xvij m & 1/2 & xxij Roeden & 1/2 van haren Lande dat leghet in die prochie van houtawe bi onsen houe Tuilc lant heet aldus Die slede Ende Beronds nunnards hoefstede dat houd vij m & 1/2 m & xxiij Roeden Echter die zompe die houd iiij m & xi Roeden Echter bider hoefstede dar Jan bicghe woende ij 1/2 m & ij 1/2 Roeden Echter of hoestalf an onse gracht i stic dat houd i 1/2 m & v Roeden Echter ij stringheline die legghen of suud alf ser gosins walle die houden 1/2 m & xxviij Roeden Echter 1/2 m & xxviij Roeden bi cladkins ligghende an onse lant te noerd ende van j stringhe Echter 1/2 m & iiij 1/2 Roeden dat strecket van den stringhe ostward tote cladkins hoefstede Echter lxx Roeden & 1/2 Roede die lechghen of oest alf an onse lant dat gabbards was Ende wie bekennen dat wie onse lant die xvij m lands & 1/2 m & xxij Roeden & 1/2 die te voren sijn gheseit hebben vp ghegheuen voer vrie scepen van den brucscen ambochte te wlre weet den here Janne coepmanne ende den here martine van essen meesters van sente marien magdalenen huse Ende die selue meesters gauen ons weder vore vrie scepen te wlre wet die voerseide xvij m & 1/2 & xxij Roeden & 1/2 hars lants dat te voren es ghenoment Ende wie beloueden den vogheden van sente marien Magdalenen huse ende sie ons weder bi sekerheden dat wie onse lant dat daer te voren ghenomet es hem leden houden sullen quite ende vri sonder cens ende sonder calaenge ewelike Ende dat selue hebben si ons gheloft die meesters ende die broeders van sente marien Magdalenen hus Hier toe omme elc lant te makene euen goet waren woutre hannins soene ende hannekin bicghe prochiane van houtawe vinders ghecoren an beden siden ende sie wijsden den abt enten conuente die voerseit sijn ene redenlike somme van peneghen den huse van sente marien Magdalenen omme dat onse Lant was ghewijst argher dan thare Ende die somme van peneghen hebben wie hem al vergouden Deise voerworde ende dese wijssel van den lande die te voren ghenoment sijn hebben gheloeft die partien an beden siden vast ende ghestade te houdene bi sekerheden an beden siden
</main>
<end>
Ende wie jn die orconscepe van desen dinghen hebben ghehanghen onse zeghele an dese Lettren Dit was ghedaen Jnt Jar van ons heren ghebornesse M cc lx sexto Jn die maen van Nouembre tsaterdaghes Na alhelghen messe Jn de kerke van sent donaes Na vespren
</end>