Compilatiecorpus Historisch Nederlands 1.0 (CHN): ambtelijke teksten 1250-1800: brugge_1266_3

<begin>
Wie willem stenwerdere lambert hamer rudders johan van cleyhem clais f domini willemans hugo f willards riquard dining boidin brokra & thideric van rassewale scepene van den vrien van brughamboch orconden & doen teverstane allen den ghoenen die dese lettren sullen sien jof horen
</begin>
<main>
dat cam voer hons bouden f boudens de houkemet & sibelia sin wief & gauen ghifte thomaese prioer van den Echout ter kerca beof van den Echout van iij jmete & xij roeden lants lichtelic min of mer welk lant leghet in die prochie van metkerca nort ost van der kerca vp honkevliet bider monec lant & dit lant heet bollards lant & tewette tewaren ieghen elken mensche wech & lant vrie lant quite lant & ter kerca vrieneghindome Voert heift dese thomaes prior weder ghifte ghegheuen desen bouden f boudens als van der kerca alue van den Echout jn rechten wisselinghe iiij linen lants lichtelic min of mer & welk lant leghet jn die prochie van zuenkerca vor sin hostede daer dese selue bouden woent & tewette tewaren ieghen elken wech & lant vrie lant quite lant & tesinen vrieneghindome
</main>
<end>
ende omme dat dese dinc aldus vor hons wechtelic juaren heift & zoe vaste & ghestade bliue & wie hier over stonden als scepene soe hebben wie dese lettren beseghelt met honsen seghelen dit was ghedaen vor hons & dese ghifte ghegheuen saterdaghes voer sinte amans daghe jnt jaer hons heren als men scrijft sin jncarnation millesimo ducentesi sexagesi
</end>