Compilatiecorpus Historisch Nederlands 1.0 (CHN): ambtelijke teksten 1250-1800: brugge_1266_4

<begin>
Wie riquard van straten woutre van catsant hugo storem rudders johan van Cleyhem thierin van score mon zod riquard van stenkete scepene van den vrien van brughambocht orconden & doen tauerstanen allen den ghoenen die dese lettren sullen sien jof horen
</begin>
<main>
dat cam vor honsleden roger filius lams in metkerca & lisabetta sin wief & gauen wechtelic ghifte ere lisabetten f jacop filii doyters debeghine van iij jmete lants lichtelic min of mer welk lant leghet in die prochie van me[t]kerca nort van der kerke & welk lant es gheeten middelstic & nortmaet & dit lant hebben ghelouet dese roger & lisabetta sin wiif deser lisabetten der beghinen tewette tewaren ieghen elken mensche wech & lant vrie lant quite lant & sonder scout & te haere vrieneghindome Vort heift ghenomen dese roger van lisabetta deser beghine dit vorseit lant tereuelic cense omme xl sol elx jars tegheldene sinte marien lichtmesse & een pont pepers coep & versteruenesse & elneghen coep
</main>
<end>
& omme dat dese ghifte vast b[li]ue & ghestade & aldus wettelic juaren heift & wie hierover stonden als scepene soe hebben wie dese lettren beseghelt met honsen seghelen dit was ghedaen vor hons tsurindaghes vor sinte pieters daghe coudermesse jnt jaer hons heren als men scrijft sin jncarnation m cc lx sexto
</end>