Compilatiecorpus Historisch Nederlands 1.0 (CHN): ambtelijke teksten 1250-1800: brugge_1266_5

<begin>
Alle die goene die dese lettren sullen sien
</begin>
<main>
Jc Jan coepman Ende ic martin van essen porters van brucghe ende meesters ghecoren ende gheset bi scepen van brucghe van den hus van sente marien Magdalenen bi brucghe doen te verstane dat wie bi den rade der broeders van den seluen sente marien Magdalenen huse ende biden ascente ende biden wille der scepen van brucghe hebben ghewijsselt xvij m & 1/2 & xxij Roeden & 1/2 lands van sente marien Magdalenen lande dat leghet jndie prochie van houthawe biden houe der moneke van sent andries bi brucghe Tuilc lant bi sticken heet aldus Die slede ende berons nunnars hoefstede dat hout vij m & 1/2 m & xxiij Roeden Echter die zompe iiij m & xi Roeden & bider hoefstede dar Jan bicghe woende ij 1/2 m ende ij 1/2 Roeden Of ost alf der moneke gracht j stic dat hout i 1/2 m ende v Roeden & ij stringheline die licghen of suud alf ser gosins walle die houden 1/2 m & xxviij Roeden & 1/2 m ende xxviij Roeden bi cladkins licghende ander moneke lant te noert ende van haren stringhe Ende 1/2 m & iiij 1/2 Roeden dat strecket ostward van den stringhe tote cladkins oefstede Ende lxx Roeden & 1/2 die licghen of ost alf an hare lant dat gabbard was hebben ghewijsselt jeghen den abt ende jeghen coeuent van sent andries bi brucghe omme xvij m lands & 1/2 & xxij 1/2 Roeden van der moneke lande dat leghet jn die prochie van houthawe bi onsen hus bi sticken tuilc lant heet aldus Coesters lant dat hout iij m ende xxxij 1/2 Roeden Echter bertolfs lant dat hout v m ende j line & xx Roeden Echter watermeet die hout vij linen & xxiij Roeden Ende of suudalf der watermeet lxxiiij Roeden Echter vj m ende j line ende xxiij Roeden die licghen weest ouer den wech bi onsen huse die strecken na den weghe die gaet te wendunen ward Ende wie bekennen dat wie dit lant van sente marien magdalenen die xvij m lans & 1/2 & xxij 1/2 Roeden die te voren sijn gheseit hebben vp ghegheuen vore vrie scepen van den brucscen ambochte te wlre wet den abt enten conuente van sent andries bi brucghe En tabt biden consente van sinen coeuente gaf ons wedre vor wrie scepen te wlre wet die vorseide xvij 1/2 m ende xxij 1/2 Roeden hars lants dat te voren es ghenoment Ende wie beloueden den abt enten coeuente van sent andries bi brucghe ende si ons wedre vogheden ende broeders van sente marien Magdalenen huse bi sekerheden dat wie onse lant dat dar te voren ghenoment es hem lieden houden sullen quite ende vri sonder cens ende sonder calaenge ewelike Ende dat selue hebben ons gheloeft die abt ent coeuent van sent andries bi brucghe Hijr toe omme elc lant te makeneeuen goet waren woutre hannins soene ende hannekin bicghe prochiane van houthawe vinders ghecoren an beden siden Ende si wijsden den abt enten conuente die vorseit sijn ene somme redenlic van peneghen te gheuene onsen hus van sente marien Magdalenen omme dat onse lant was ghewiset beter dant hare ent die somme van den peneghen hebben ons die vorseide abt ent conuent van sent andries bi brucghe al vergouden Deise vorworde ende dese wissel van den lande die te voren ghenoment sijn hebben ghelouet die partien an beden siden vast ende ghestade te houdenne bi sekerheden an beden siden
</main>
<end>
Ende wie in die orconscepe van desen dinghe jc jan coepman Ende jc martin van essen meesters ende wie broeders van sent marien Magdalenen huse hebben ghehanghen onse zeghelen an dese lettren Dit was ghedaen jnt jar van ons heren ghebornesse almen scriuet mcclx sexto jn de maent van nouembre saterdaghes na alre helghen messe jn die kerke van sent donaes na vespren
</end>