Compilatiecorpus Historisch Nederlands 1.0 (CHN): ambtelijke teksten 1250-1800: brugge_1267_2

<begin>
Min here woutre van Caedsant ruddre min here wouterman van ghent Ruddre Jhan de Goes Diederic van rasewale Jhan de brune Symoen zot Diederic f storms Wi vrie scepenen van brugghe ambocht doen te verstane allen den ghenen die dese lettren sullen sien
</begin>
<main>
dat boidin f margrieten ende margriete sin wijf quamen vor ons hars dancs ende hars willen ende vercochten Jhanne f lamsoets portre van brugghe een ghemet lands lichtelic min of lichtelic mer twelke land leghet jnt ambocht van lisseweghe ende dar die vorseide boidin ende sin wijf vp woen ende gauens hem wettelike Ghifte ende gheloueds hem te waerne Ende die vorseide boidin ende margare[te] namen dat vorseide land van dien vorseiden Jhanne tarueljken chense omme tiene s elcs jaers van den welken men sal ghelden dene helt te sente martins messe ende dander helt te half marte Ende telken als dat vorseide lant versteruet so est sculdich dien vorseiden Jhanne een half pont wasses te versoecnessen ende vort te bliuen staende ten seluen chense
</main>
<end>
Ende om dat wi ouer dese ghifte stonden als ouer vrie schepenen so hebben wi dese lettren gheseghelt met onsen seghelen Dit was ghedaen jnt jaer als men scrift tincarnatioen ons heren mcclxvii jn meyauende
</end>