Compilatiecorpus Historisch Nederlands 1.0 (CHN): ambtelijke teksten 1250-1800: brugge_1267_3

<begin>
Wie thideric van rassewale iohan goes woutra weuel riquard dining thomaes hond hughe tsoen riquard van stenketa ende iohan weuel scepene van den vrien van brugambocht orconden & doen tauerstane allen den ghoenen die dese lettren sullen horen lesen jof zien
</begin>
<main>
dat cam vor honsleden hannin tsolre ende margarieta sin wief ende vorchocte & gauen vor hons wettelike ghifte eenre adelise f gosins beghine van v linen lant lichtelic mer of min welk lant leghet int ambocht & in die prochie van lisseweghe nort van der kerca bi den lande dat was lamsins f diedelen & dat lant es gheeten stic daer die wale & die v linen lants die lighen vpt oest side van den stic daer die wale in leghet ende dit lant hebben gheloeft dese hannin & margharieta sin wif deser adelise tewette tewaren ieghen elken mensche wech & lant vrie lant quite lant & sonder scult met i d jars te deser adelise vrieneghindome vort hebben sie dit lant ghenomen van deser adelise teruelic cense hem ende haeren ofcomende omme xx sol jaers goeder vlamcher peneghe tegheldene tesinte iohans messe mids somers & een pont was tecope & tauerstaruenesse
</main>
<end>
& omme dat dese dinc vast blijf & ghestade & wie dit kennen als scepene soe hebben wie dese lettren beseghelt met honsen seghel dit was ghedaen saterdaghes vor sint marien dach magdalenen jnt jaer hons heren als men scrijft sin jncarnation m cc lx vij
</end>