Lijst
Compilatiecorpus Historisch Nederlands 1.0 (CHN): ambtelijke teksten 1250-1800: brugge_1267_4
<begin>
Wie woutra van catsant hughe storem rudders thiederic f storems ende moen zot scepene van den vrien orconden & doen tauerstane allen den ghoenen die dese lettren sullen sien lesen of horen
</begin>
<main>
dat cam vor hons Gillis die rode ende clemma sin wif & vorchocte & gauen vor hons wettelike ghifte van iij jmete lants lichtelic min of me ene johanne den blowel den clerc ter kerca beof van sint marien van brughe welk lant leghet in dat ambocht ende in die prochie van vlardslo nortost van der kerca ende dat lant es gheeten gillis roden hofstede een del ende es belopen met ere gracht die algader es des gillis buter gracht bewestalf viervoete ostwaert buter hofstede van dier zued side nort soe uele dats es iij jmete an oest side so leghet lenter kint lant ende adelisen herrads wedewe lant bezuedalf so leghet aket filius dans lant nortwart so leghet das gillis leen ende hankins lant lantheren bewestalf leghet iohans lant van den damme ende dit lant hebben sie gheloeft tewette tewaren ieghen elken mensche wech & lant vrie lant quite lant & ter kerca vrieneghindome & dit vorseide lant hebben weder ghenomen dese vorseide lieden gillis rode & clemma sin wif van desen johanne den clerc van der kerca alue die vorseit es teruelic cense omme xx sol jars goeder vlamcher peneghe tegheldene sinte marien lichtmesse
</main>
<end>
ende omme dat dese dinc vast bliif ende ghestade ende aldus wettelike juaren heift so hebben dese lettren beseghelt met honsen seghel dit was ghedaen vor hons saterdaghes naer sint pieters daghe jnganckede houst jnt jaer hons heren als men scrijft sin jncarnation m cc lx septimo dat s[i]
</end>