Compilatiecorpus Historisch Nederlands 1.0 (CHN): ambtelijke teksten 1250-1800: brugge_1268_1

<begin>
Jhan van versnare boidin de Broekre diederic van racewale Moen de zot doumaes de hont Jhan de Brune woubrecht f hughes brunen Wi vrie scepenen van brugschambocht doen te verstane allen den Ghenen die dese lettren sien horen ende lesen sullen
</begin>
<main>
dat quamen vor ons hars dancs ende hars willen ene adelisa Jannes wedewe van leffinghe ende colard van leffinghe hare soene ende margrieta dies colards wijf ende boidin van leffinghe sin broeder ende vercohten enen iacoppe f pieters portre van Brugghe al de Rente beset vp lant die si hadden binnen leffinghe Ende binnen stene ende tesnellengherskerca ende in arlebouds capella ende te middelkerca binnen des camerlinghes ambochte Ende van deser vorseider renten es die summa neghenentuintich pont ende seuen peneghe goeder vlaemscer peneghe elcs iaers Ende gauense hem om ene summe van peneghen die hem es wel ende wettelike vergouden Ende van deser vorseider rente so halmeden hem die vorseide adelisa ende colard ende margrieta ende boidin vor ons vorseide scepenen ende gauer of wettelike ghifte dien vorseiden Jacoppe nader wet vanden vrien ende ghelouedens hem te wette te waerne Ende van deser vorseider rente es men sculdich dien vorseiden iacoppe tegheldene coep ende versterfnesse elkerlijc vp sin stic Ende men es sculdich dese rente te gheldene te tuen tiden binnen den Jare dene helt te sente Jhans messe ende dander helt te sente baues messe daer naer
</main>
<end>
Ende om dat wi vorseide scepenen willen dat dese dinc si seker ende ghestade ende sonder calaigne so hebben wi in Orconden van desen dinghen dien vorseiden Jacoppe dese lettren gheseghelt met onsen propren zeghelen Dit was ghedaen Jnt iaer ons heren alse men scrijft sijn Jncarnatioen M cc lxviii saterdaghes na pasche dach
</end>