Compilatiecorpus Historisch Nederlands 1.0 (CHN): ambtelijke teksten 1250-1800: brugge_1268_10

<begin>
</begin>
<main>
Hannin moisin vercochte arnoude Brantine den clerc ter abdessen ent den sustren behoef van sinte claren bi Brugghe achte linen lants lettel min iof lettel mee Die ligghen in die prochhie van zantuorden ten west ende van der prohhie up den ghemeenen waterganc van sere woutermans ambochte ende van ghistele die heet die vliet daer dese hannin moisin up woent ent dat lant heet pitacker omme ene somme van peneghen die dien hannine al ghehellike vergouden es ende van dien lande gaf die hannin moisin wettelike ghifte dien arnoude ter abdessen ent ten sustren behoef diere vorseit siin ende weddet hem te wette te warne vri lant ende quite lant te vrien eighendome Vort gaf die arnoud brantin dien seluen hannine moisine Die vorseide achte linen lants van der abdessen ende van der sustren haluen diere vorseit siin ent das die arnoud macht heeft bi haren uthanghenden lettren terueliken chense omme viertech sol vlamscher peneghe elx iars euwelike te gheldene Dene helt te sinte marien lichtmesse ent dandre helt te sinte kerstoffers messe Dit lant sal ghelden tue pont was van copen ende tue pont van versteruenessen alst gheualt Dit kennen schepnen van den vrien daer dit voren ghedaen was min here wouterman van ghent ruddre Johan goes Boidin broekere thierin van score moen sot Diederic van rassewale gillis f diederix ende riquard dininc
</main>
<end>
Dit was ghedaen int iaer ons heren als men scriift sine incarnatie m cc & lx ende achte saterdaghs na sinte lourens daghe
</end>