Compilatiecorpus Historisch Nederlands 1.0 (CHN): ambtelijke teksten 1250-1800: brugge_1268_2

<begin>
Min here wouterman van ghent ruddre Jhan van varsnare Jhan de goes Jhan de brune bouden de yserine Wouter filius serhakets Thierin van score wi vrie scepenen van brugscambocht doen te verstane allen den Ghenen die dese lettren sullen sien horen ende lesen
</begin>
<main>
dat quamen vor ons hars dancs ende hars willen Een heinric f lippins ende adelisa sijn wif ende vercochten enen iacoppe f peters portre van brugghe ende auesoeten sinen wiue vi m lands ende i line lands lichtelic min of lichtelic mer ligghende in de prochie van stene binnen des camerlinghes ambochte ende leghet te desen vir sticken vp meindalen meet i 1/2 m vp segherstic vp den westoeuer vij linen masins stickelin metten werue i m preter xxv Roeden Jn de werfinghe v linen preter xxv Roeden ende gauense hem om ene summe van peneghen die hem es wel ende wettelike vergouden Ende van dien vorseiden lande halmden hem die vorseide heinric ende adelisa sin wijf ende gauer of wettelike ghifte dien vorseiden Jacoppe ende auesoeten sinen wiue vor ons vorseide scepenen nader wet vanden vrien Ende ghelouedens hem scadeloes te waerne Ende die vorseide iacop ende auesoete sin wif gauen weder dien vorseiden heinrike & adelisen sinen wiue dat vorseide lant te erueliken chense om iii lb goeder vlaemscher peneghe elcs iaers ende dar of salmen ghelden dene helt te sente Jhans messe ende dander helt te sente baues messe daer naer Ende dit vorseide lant es sculdich dien vorseiden iacoppe of sinen oire coep ende versterfnesse Ende vort so es Jhan de brune scepene hir vorseit borghe Wart so sake dat vp dat vorseide lant meer sculden stonde dan xxviii d elcs iaers Jof dat iemen calengierde dat vorseide lant van sculden of van heritagen of van enighen sticken dat hit dien vorseiden Jacoppe soude suueren sonder sinen cost ende houden scadeloes
</main>
<end>
Ende om dat wi vorseide scepenen willen dat dese dinc si seker ende sonder calaigne so hebben wi dien vorseiden iacoppe in orconden van desen dinghen dese lettren gheseghelt met onsen propren seghelen Ende ic Jhan de brune scepene vorseit kenne metten andren vorseiden scepenen dese borechtucht vp mi seluen Dit was ghedaen in de borech vor de loue Jnt iaer ons heren als men screef sin incarnatioen m cc lxviii surindaghes na meie dach
</end>