Compilatiecorpus Historisch Nederlands 1.0 (CHN): ambtelijke teksten 1250-1800: brugge_1268_3

<begin>
Mijn here wouterman van ghent ruddre Diederic vos ende Diederic van Rasuwale Wi scepenen vanden vryen doen te wetene alden goenen die dese lettren zullen zien ende horen
</begin>
<main>
Dat Lucia boudens stommen wedewe Lyzebettha haer dochter ende Johan f weitins haer man ende magrieta derre lucyen dochter zijn comen vor ons ende hebben verlijt vor ons dat si hebben vercocht ende hebben up ghegheuen ende hebbere hem ghehalmt ende ghewed te wette te waerne ieghen elken mensche vor ons Mestre Pietra culine pape van sint crues viere linen lants legghende upt vrya jn die prochia van dudzele twilke lant heet die vane Eghins lants ende wech der toe Uort so zijn comen vor ons willem derre Lucyen broeder ende Lammin f agheten voghede eens hannekins derre lucien kint dat ombeiaert es ende hebben ghewed desen vorseiden mester Pietre Culine tien lb ioft sake ware dat si dat ombeiaerde kint hem niet ne brochten te wetteliker halminghen vandien vorseiden lande alst quame te sinen jaren ende het beiaerd ware Ende dese mester Pieter culin heeft dit lant weder ghegheuen te chense desen vorseiden Johanne f weitins ende lyzebetthen sinen wive te tien jaren omme zestien sol timet siaers te gheldene telken sinte bamesse den chens van den lande
</main>
<end>
Ende omme dat wi vorseide scepenen waren gheroepen van af beden desen partien dit te kennenne so hebwi dese lettren te kennessen vthanghende ghezeghelt met onsen zeghelen Dit was aldus vor ons ghedaen binder porte van vor sborechgrauen capelle sinte marien magdalenen auonde jnt iaer alsmen scrift M CC lx ende achte
</end>