Compilatiecorpus Historisch Nederlands 1.0 (CHN): ambtelijke teksten 1250-1800: brugge_1268_4

<begin>
Riquard van straten ruddre Johan brune Gillis f diederix hughe f willards moen sot Diederic f storms Diederic vos hughe soen johan goes woutra f serakets ende woubrat f serhughes brunen schepen van den vrien Doen te verstane hem allen die dese lettren sullen sien ende horen
</begin>
<main>
Dat vor ons quam Boudene van heile ende joncvrouwe adelise siin wiif ende vercochten ende ghauen wettelike ghifte Janne danwilde portre in brugghe Dertich imete vri eighin lants lettel min iof lettel mee ent die tue imete van desen xxx imeten ghelden elc imet vj d siars sgrauen brieuen ende al dit lant leeght int ambocht van ardenburg in die procchie van heile ent dus heeten die stix Gillis snauwards stic houdets j imet ende vi roden Daer bet suut tuschen heinrix lande van den poele ende outfards van der mude iij imete preter xxx roden stic dat was sabs van den soetendale besuut leghets iiij imete ende xxxi roden Noch bet suut stic dat was sabs van den soetendale houdets ii imete ende xv roden west ouer den vliet j imet ende lxx roden jacobst stic ent dat behoest half der an leghet houdets iij imete preter xliiij roden Jn den hoec ij linen preter iiij roden bewesten boudens van heile beosten dike leghets iiij imete ende lvi roden beoest half an die iiij imete leghets v imete ende lxxi roden tlant daer gillis die broekere up woent dat boudens marlins was houdets imete preter lxxi roden ende al dit lant hebben si hem ghewed te wette te warne vrie lant ende quite lant wech ende lant te sinen vrien eighendome sinen vrien wille mede te doene ende onghecalengiert te houdene van elken mensche Ende al dit lant dat hier vorseit es heeft hem dese ian danwilt ende lisebette siin wiif weder ghegheuen terueliken chense omme xvj lb goeder vlamscher peneghe siars te gheldene elx siars te sinte martins messe
</main>
<end>
ende omme dat dese dinc bliue ghestade ende sonder calengne vortwartmee hebben wie schepnen vorseit onse seghele ghehanghen an dese lettren Dit was ghedaen int iaer ons heren alst men scriift sine incarnatie m cc ende lxviij in sinte andries daghe
</end>