Compilatiecorpus Historisch Nederlands 1.0 (CHN): ambtelijke teksten 1250-1800: brugge_1268_5

<begin>
</begin>
<main>
Hugo malin vercochte arnoud brantine den clerc ter abbedessen & ter sustere boef van sinte claren bi brucge vier linen lands die licgen bin den ambochte van den yzendike tusschen hughe malins & arnouds van oestburgh & vijf linen tegadere licgende die heten vijfvirendeel & die rietmaet & vijfvierendeel die heten weststoppel & dit lant leghet tusschen rabbouds weghe & naueem bin den ambochte van yzendike dat vorseit es & die vier linen tusschen nauweem & arnouds van oestburgh die vorseit sijn heten renghers belc jtem lonekin f clais vercochte arnoude brantine ter seluer abbedessen & susteren boef tue ymete lands bin den seluen ambachte tusschen nauwem & boidin f noids die heten drie ghemete Meus malin vercochte den seluen arnoude brantine ii 1/2 mensuras lands bin den ambochte van oestburgh die licgen an quackelars wech & heten cortbelc ter abdessen & ter sustere boef die vorseit sijn Ende van desen vorseiden landen also alsi vorseit sijn gauen wettelike ghifte desen arnoude brantin ter abbedessen & sustere boef vorseit hughe malin van sinen lande dat vorseit es lonekin f clais & ymmesota sijn wijf al diere ghelike berthelemeeus malin & katerine sijn wijf al dier ghelike & weddent tewarne vri lant & quite lant te vrien eghindome & bekenden hem wel dat hem ghenoech ware ghedaen van den ghelde van desen vorseiden lande & dese arnoud brantine gaf weder van der abbedessen & susteren aluen des hi macht heft bi haren letteren desen hughe maline tlant dat hi vercochte te erueliken chense om virtich sceleghe siaers & lonekin f clais & ymmesoten sinen wiue tlant dat si vercochten te erueliken chense om tuintich sceleghe siaers & meuse malin & katerine sinen wiue tlant dat si vercochten om tuintich sceleghe siaers tegheldene die ene helt te sinte ihansmesse & dandere helt te sinte martins messe elx iaers & elc pont sal ghelden een pont was van cope & een pont was van versterfnessen Dit kennen scepenen van den vrien dart voren ydaen was here boidin brokra ruddra thieric van rasewale johan goes johan die weuel wouter die weuel renuerd f godelindis & riquard dininc
</main>
<end>
Dit was ghedaen tsdinxendaech vore seint simoens & seint juids daghe jnt iaer ons heren als men scrijft sijn incarnation tuelef ondert & lxviii
</end>