Compilatiecorpus Historisch Nederlands 1.0 (CHN): ambtelijke teksten 1250-1800: brugge_1268_6

<begin>
thiederic filius storems moene die sot riquard dininc woutra wilde gilis filius thiedercs thiederic van rasewale jhan die weuel ende heinric van esene schepenen vanden vrien Doen te verstane alden goenen die dese lettren sullen horen ende zien
</begin>
<main>
Dat Camen vore ons hughe van wulpen filius weitins ende Clemme sijn wijf ende gaven halme ende wetlike ghifte Ere agheten filia wouters scaex van tueen ghemeten lands ende Enen vierendeel ghemeets lands lichtlic min jof lichtlic meer ligghende jnt ambocht van oestburgh jn die prochghia ter Niewere kerke besuydhalf heins flius jmmen tussche den tueen weghen bewesthalf an agheten wedewe clais filius meinoeds lande ende beoesthalf willems lande filius beten ende moenecsins lande wech ende land ende quite land te wetten te warene te vrien eghinedome diere vorseidere agheten ende van cope ende van versterefnessen pont wasch Endat land heuet die vorseide aghete filia wouters scaex wedere ghegheven wetlike te arfliken cense dien vorseiden hughen filius weitins van wulpen elkes jaers omme vivende tuyntich scheleghe goedere vlaemschere peneghen te gheldene te sinte bavesmesse jnt jaer
</main>
<end>
Dit was ghedaen saterdaghes naest sinte Nicholaus daghe vore medewinter jnt jaer ons heren alsemen scriuet deincarnation m cc lx octauo
</end>