Compilatiecorpus Historisch Nederlands 1.0 (CHN): ambtelijke teksten 1250-1800: brugge_1268_7

<begin>
Miin here riquard van straten ruddre stasiin tolnare Diederic vos jan Brune moen zot jan goes heinric van essene ende woutre weuel schepnen van den vrien Doen te verstaene hem allen die dese lettren sullen sien ende horen
</begin>
<main>
Dat quamen vor ons weitin die vos ende berte siin wiif van ettelghem ende vercochten der keerken ent den pape ent den costre van sinte giellis Drie jmete lands die ligghen in die prochhie van ettelghem ommetrent die hoefstede daer dese weitin die vos ende Berte siin wiif woenen Ent dit land hebben sie weder ghenomen van der kerke ende van den pape ende van den costre van sint Gieliis in Brugghe terueliken chense omme Dertich scheleghe vlamscher peneghe elx jars Das sullen si ghelden elx jars te sinte jans messe Der kerken vj sol Den pape vi sol ent den costre iij sol Ende elx jars te metwintre Der kerken vi sol Den pape vj sol ent den costre iij sol Ende van coepe jof van versterfnesse soe salment versoeken met x sol
</main>
<end>
Ende omme dat dese dingh sal bliuen ghestade ende sonder kaleenge soe hebben wie dese lettren gheseghelt met onsen seghelen Dit was ghedaen int jar ons heren alsemen scriift mcc ende lxvij svrindachs vore sinte marien daghe liichtmesse jnt ghiselhuus binnen sboergrauen tune
</end>