Compilatiecorpus Historisch Nederlands 1.0 (CHN): ambtelijke teksten 1250-1800: brugge_1268_8

<begin>
Mijn here Riquard van straten Ruddre Thideric damhoudere Ende woutre weuel schepenen vanden vrien Doen te verstane ende te wetene allen Dien dese lettren sullen horen ende zien
</begin>
<main>
dat Riquard hebs soene Ende maria sijn wijf die ghegheven hadden willekine lambrechts soene ander half ghemete lands preter viertiene roeden lichtlic min jof lichtlic meer ligghende jn straten Dat wilke land heet woutre gabbards land te arfliken cense omme neghene scheleghe siaers al dat recht dat die vorseide riquard hebs soene ende maria sijn wijf hadden jn dat land quite scouden wetlike vore ons Ende dat die vorseide willekin f lambrects van dien vorseiden lande gaf halme Ende wetlike ghifte den here michiele prochghiaen pape van sinte saluators Ende dere michiel gaf dat selue land dien vorseiden willekine lambrects soene terveliken cense omme neghene scheleghe siaers te gheldene dien cens elkes jaers sinte martins messe ende wllen coep ende versterfnesse alse het gheuallet
</main>
<end>
Jn kennessen van desere dinc ende jn ewelikere vastnesse hebben wi dese lettren gheseghelt met onsen seghelen vthanghende Dit was ghedaen saterdaghes vore meie jnt jaer ons heren alsemen scriuet deincarnation mcc lx octauo
</end>