Compilatiecorpus Historisch Nederlands 1.0 (CHN): ambtelijke teksten 1250-1800: brugge_1269_1

<begin>
</begin>
<main>
Weite malin vercochte arnoude brantine den clerc ter abbedessen ende ten sustren behoef van sinte claren Tue imete lands ligghende int ambocht van ysendike binnen der prochien van sinte katerinen daer hie up woent ende heet mormeet Pieter malin vercochte dien seluen arnoude ter abbedessen ent den sustren behoef drie vierdendele lands ligghende int ambocht ende in die prochie vorseit beoesthalf an gosins wech int belxin ende Tue linen lands in den langhen polre besuut half den hereweghe Clementie weite preits weduwe vercochte dien arnoude ter abbedessen ent ten sustren behoef vorseit een jmet lands int ambocht ende in die prochie vorseit dat heet crupers land beoesthalf an rabbouds weegh elc omme ene somme van peneghen die hem vergouden es Ende van eersten tuen jmeten lands ghauen wettelike ghifte weite malin ende auesoete siin wiif ende van den drien vierendelen ende ii linen lands ghauen wettelike ghifte pieter malin ende kateline siin wiif Ende van den i imete lands vorseit ghaf wettelike ghifte Clementie die hier vorseit es ende weddent alle te wette te warne elc ouer siin land vri land ende quite land te vrien eyghendome ende arnoud die vorseit es gaf van der abbedessen ent den sustren haluen das hie macht heeft bi haren uthanghenden lettren dien weite maline Tlant dat hie vercochte omme xxv sol siars Ende pietere maline tlant dat hie vercochte omme ix sol siars ent diere Clementien tlant dat soe vercochte omme x sol siars ende al terueliken chense te gheldene elx iars dene helt te sinte ians messe Ent die andre helt te sinte bauesmesse Ende hier of sal ghelden elc lb ghelts i lb was van coepe ende van versteruenessen Dit kennen schepnen van den vrien wouter wilde diederic vos johan goes domaes hont johan brune wouter weuel ende iohan weuel
</main>
<end>
Dit was ghedaen int iaer ons heren als men scriift sine incarnatie mcc & lxviij dinsendaghs vore sinte vincensiis daghe
</end>