Compilatiecorpus Historisch Nederlands 1.0 (CHN): ambtelijke teksten 1250-1800: brugge_1269_14

<begin>
Mijn here boudene die broekre Johan die goes Johan van cleihem Diedric van rasewale reinuard f godelinden tierin damhoudre Doemaes die hont Johan van snipgate & willem die corte scepene vanden vrien doen teuerstane allen dien goenen die dese lettren sullen horen & zien
</begin>
<main>
Dat cam voer onsleden Joncurowe godelief broeder michiels suster van thoroud sionghen & gaf vp jn wetteliken ghiften Joncurowen lauretten als dienst wijf vanden wijngaerde bi brugghe ter fermerien boef vanden wijngaerde een stic lands & es geheten die belec & daer toe dat hus & die bome die ten beleke behoren & dese belec was jan rummouds ofstede ende voren zo gaet die ofstede tote sgrauen strate toe & achterward zo ent soe an briele maerx & strect an die west zide bi heinekins longhe speis & an die oest zide an eueraerds kinder boudeloets broeder was ende dit vri land ende heighin land & quite land met i 1/2 d te sculden & dese belec leght jnt ambocht van thoroudhoec binder prochie van thoroud & desen belec heft soe hare ghewedt wel & wettelike te ghewaerne jegen elken mensche wech & land
</main>
<end>
Dese ghifte was vp ghegeuen saterdaghes voer meie daghe dit was int jaer ons heren als men scrijft zijn jncarnatioen Mc CLxx
</end>