Compilatiecorpus Historisch Nederlands 1.0 (CHN): ambtelijke teksten 1250-1800: brugge_1269_15

<begin>
Arnoud f Willen Boidin f Alards Willem f Willems Woubrecht f gheilen Jhan van laepscure Dierkin f ghiselins Bouden dyzerine ende Clais f ser hugs f gheilen wi scepenen vanden vryen doen te verstane alden goenen die dese lettren zullen zien ende horen
</begin>
<main>
dat lammin troest Lizebettha zijn wijf ende Wouter cazeuoet des lammins troests zoene bi sinen ersten Wiue quamen vor ons ende vercochten ende gauen halm ende ghifte ende wedden te Wette te Waerne Jeghen elken mensche den here Jhanne halse capellaen van sint Saluatoers in brugghe ter kerke boef sint Saluatoers viere Imete lants lichtelic min iof lichtelic me Vry lant eghin lant ende quite lant der kerken sint saluatoers te Vrien eghindome legghende Indie prochya vanden sconendike upt Vria drie Imete ende zesse ende dertich Roeden heten Yzeghers lant ende een Imet preter xxxvi Roeden die heten nordmeet Ende dese vorseide lammin troest ende zijn wijf Lizebetthe zijn worden Eeruelike chensers der kerke Van sint saluatoers van al den vorseiden lande omme Viertich solidi goeder vlaemsch peneghe siaers te gheldene sinte martins daghe Vor medewinter ende Wllen coep ende wlle versterefnesse met ghehelen chense vanden jare
</main>
<end>
Ende omme dat dit aldus vor ons was ghedaen so hebwi dese lettren te kennessen vthanghende ghezeghelt met onsen zeghelen Dit was vor ons ghedaen anderdaghe meyes Int jaer alsmen scrift van ons heren Incarnatioene m cc ende zeuentich
</end>