Lijst

Compilatiecorpus Historisch Nederlands 1.0 (CHN): ambtelijke teksten 1250-1800: brugge_1269_2

<begin>
</begin>
<main>
Willem colpart ende bele siin wiif vercochten arnoude brantine den clerc ter abbedessen ent ten sustren behoef van sinte claren Tue imete lands ende xxx schachte die ligghen int dambocht van ysendike in die prochhie van sinte katerinen ent dat heet mudslant daer sie up woen ent Tue jmete lands preter xl schachte dat leght beoesthalf an rabbauds weegh int ambocht ent die prochhie vorseit dat heet Crupers lant Ende vij vierendele lands die ligghen int vorseide ambocht ent die prochchie besuuthalf maes f gheilen ende heeten sclichte meet Ende van al den vorseiden lande ghauen wettelike ghifte willem colpard ende bele siin wiif den vorseiden arnoude brantine ter abbedessen ent ten sustren behoef vorseit ende weddent te warne vri lant ende quite land te vrien eighendome Ent die vorseide arnout brantin gaf van der abbedessen ent den sustren haluen vorseit das hie macht hadde bi haren uthanghenden lettren dien willemme Ende Belen vorseit dit vorseide lant terueliken cense omme Drie lb siars te gheldene dene heelt euwelike elx iars te sinte ians messe ent die andre heelt te sinte Bauesmesse met iij lb was van cope ende van versteruenessen Dit kennen schepnen van den vrien Diederic f storms moen sot johan goes Domaes hont Bouden yserine wouter weuel ende hughe soen
</main>
<end>
Dit was ghedaen int iaer ons heren als men scriift sine incarnatie m cc & lxviij in sinte marien daghe ter lichtermesse
</end>