Compilatiecorpus Historisch Nederlands 1.0 (CHN): ambtelijke teksten 1250-1800: brugge_1269_6

<begin>
Miin here Boudene broekra ruddra Johan van Cleyem Woutre wilde Johan van laepscure Johan grote Diederic f Boudens ende Diederic van rassewale schepnen van den vrien doen te verstane hem allen die dese lettren sullen sien ende horen
</begin>
<main>
Dat vor ons camen heinric f boudens ende marie siin wiif ende ghauen wettelike ghifte Adelisen f gosins f weits van suenkerca van iiij imeten lands lettel min iof lettel meer dat leeght in mins here woutermans ambocht van ghent in die procchie van Bredene Die middelste gardinemeet houdets ij 1/2 imete Die oesterste suutmeet houdets 1/2 imet bewesten walle heinric f hebs leghets i imet Ende al dit lant alsoe alst hier vorseit es heeft dese adelise f gosins desen heinrike ende marien sine wiue weder ghegheuen terueliken Cense omme xl sol goeder vlamscher peneghe siars te gheldene elx iars dene heelt te sinte ians messe ent die andre heelt te sinte martins messe ende hier of worden sie deser adelisen wettelike censers omme dese xl sol siars te gheldene elx iars alsoe alst hier vorseit es met i ponde was te cope ende te versteruenessen alst gheualt
</main>
<end>
Ende omme dat dese dinc vor ons ghedaen was ende soe vast bliue ende ghestade hebben wie schepnen vorseit onse seghele ghehanghen an dese lettren Dit was ghedaen int iaer ons heren als men scriift sine incarnatioen m cc & lxix dinsendaghs na sinte domaes daghe in die thorout marcht
</end>