Compilatiecorpus Historisch Nederlands 1.0 (CHN): ambtelijke teksten 1250-1800: brugge_1269_7

<begin>
Bouden dyzerine Tierin van score Riquaerd dining Johan weuel woutra f sher hakets Hughe tsoen van Caedsand ende willem corte wi scepenen vanden vrien doen te wetene alden goenen die dese lettren zullen zien ende horen
</begin>
<main>
Dat hannin blankard ende heilewijf zijn wijf quamen vor ons ende gauen wettelike ghifte ende halmets hem ende wedden te wette te warne jeghen elken mensche Jacoppe van lanterne een jmet lant lichtelic min iof lichtelic me vri lant eghin lant ende quite lant te sinen vrien eghindome legghende vpt vria jnt ambocht van ghistelle zuud vanden dike ende heet in lambrechts stic Jndie prochia van ghistella Ende hannin blankard ende heilewijf zijn wijf zijn worden Eruelike chensers Jacops vander lanterne van desen vorseiden lande omme xij 1/2 s ende enen capoen tsiaers te gheldene te sinte bamesse in elc der jare ende coep ende versterefnesse alst gheualt telken metten chense van enen jare Uort quamen vor ons Clais dykre ende maria zijn wijf ende gauen wettelike ghifte ende halmets hem ende wedde te wette te warne ieghen elken mensche jacoppe van der lanterne iiij linen lants vri lant eghin lant ende quite lant te sinen vrien eghindome legghende vpt vria jnt ambocht van ghistella zud van andries zaldekins bider templiers lande af westhalf Jn die prochia van Ghistella Ende dese vorseide Clais dykre & maria zijn wijf zijn worden eeruelike chensers jacops vander lanterne van desen vorseiden lande omme x s ende enen capoen siaers te gheldene sinte bamesse jn elc der jare ende coep ende versterefnesse alst gheualt telken metten cense van enen jare Ende omme dat wi vorseide scepenen stonden ouer dese ghiften ende ouer dese eruelike chense Die te wette vor ons waren ghedaen so willen wi dat aldit vast si en wel ghehouden sende hebben dese lettren te kennessen vthanghende ghezeghelt met onsen zeghelen
</main>
<end>
Dit was aldus te wette vor ons ghedaen die erste ghifte saterdaghes vor sint johans daghe jn middel somer Ende dachterste ghifte saterdaghes vor diuisio apostolorum jnt jaer alsmen scrift van ons heren jncarnatioene mcc & lxix
</end>