Compilatiecorpus Historisch Nederlands 1.0 (CHN): ambtelijke teksten 1250-1800: brugge_1269_9

<begin>
</begin>
<main>
Arnoud colpard ende auesote sijn wijf vercochten der abbedessen ende den susteren van sinte claren bi brucge iij 1/2 ghemete lands lichtelijc min of lichtelijc meer die ligghen bin den ambochte van yzendike ende bin der prochien van yzendike daer die arnoud colpard up woent om ene seker summe van peneghen die hem te willen es verghouden Ende daer of ghauensi wettelike ghifte voer schepenen van den vrien arnoude brantine den clerc ter abbedessen ende ter sustere boef die vorseit sijn ende weddent hem te waerne vri land ende quite land te vrien eghindome voert ghaf die arnoud brantin van der abbedessen ende van der sustere haluen die vorseit sijn dien arnoude colparde die iij 1/2 ymete lands te erueliken scense omme xxx sol siaers ende tue pont was te cope ende te versterfnessen te gheldene die ene helt te sinte iohans messe baptist te middelzomere ende die andere helt te sinte bauesmesse Dit kennen schepenen van den vrien dart voren ydaen was reinuerd f godelieuen wille f serwillems die here huge storm johan van laepscure weite ratgher hugo strokin f thiederic gillis f thiederics ende oliuier van der haghe
</main>
<end>
Dit was ydaen int iaer ons heren als men scrijft sijn incarnation m cc lx ix in die maent van octobre
</end>