Compilatiecorpus Historisch Nederlands 1.0 (CHN): ambtelijke teksten 1250-1800: brugge_1270_4

<begin>
</begin>
<main>
Adelisa f hughes f boudens vercochte jacoppe van leffinghe den bakra een jmet eghins lants lichtelic min jof meer lighende jnt ambocht van lisseweghe ende jn die prochie van coudekerke omme ene seker summe van peneghe die haer gheelic vergolden siin welk lant leghet zuedwest van der kerke & es gheeten thierin die lant & van desen vorseiden lande gaf soe wettelic ghifte desen vorseiden iacoppe & weddet hem te wette tewaren ieghen elken mensche wech & lant vrie lant quite lant & das cacops vrieneghindome ende dit lant nam soe weder teruelic cense van desen vorseide jacoppe & sophia sinen wiue omme tien sol siars tegheldene sinte marthins messe jn den wintra & een par anscoen tecope & te versteruenesse & robrat f hughes deser adelisen broeder die heift ghewed vp al dat hie heift dese vorewarde teuulcomene & ghestade ende vast tehoudene sonder eneghe malengien
</main>
<end>
dit kennen scepene van den vrien min here wouterman van ghent ruddra thieric van rassewale johan goes thieric vos thomaes hont johan van snipgata wouter f domini akets & omme dat wie willen dat dese dinc vast bliift ende ghestade soe hebben wie desen zartra beseghelt met honsen seghellen dit was ghedaen vor hons saterdaghes vor sinte marien daghe magdalene jnt jar hons heren als men scriift sin jncarnation m cc lxx
</end>